AMAHAN gipusil atubangan sa mga anak ug asawa nadtong Sabado mga alas 7:30 sa gabii sa siyudad sa Gingoog, Misamis Oriental.

Gidala sa Northern Mindanao Medical Center (NMMC) ning siyudad sa Cagayan de Oro ang biktima nga mao si Rigan Carpis, 27, minyo sa susamang dapit.

Gitumbok nga suspetsado sa pagpamusil ang silingan ra usab niining si Allan Vicente.

Usa sa personahe sa NMMC nibutyag sa Sun.Star Superbalita ngadaan na nga adunay panagbikil tali sa duha ug gikabutyag nga magsige ug selos ang suspetsado ngadto sa biktima sa walay igong rason.

Niadtong Sabado sa gabii samtang nanihapon kauban sa pamilya si Carpis, kalit lang kining gipusi ni Vicente gamit ang shotgun makalima ka higayon.

Giingong gisipa sa suspetsado ang pirtahan sa panimalay ni Carpis niadtong tungora sa wala pa nahitabo ang pagpamusil.

Naigo makalima ka higayon si Carpis sa sampot nga bahin kinsa nakatalikod niadtong tungora.

Maayo na lamang wala naapil ang anak niini, deretso nga naligid ang biktima hinungdan nga gidala sa ospital sa Gingoog apan giduso ning siyudad.

Ning panahona padayon pang giobserbahan ang kahimtang ni Carpis sulod sa NMMC nga giingong luwas na sa makuyawng kahimtang.

Samtang ang kapolisan sa Gingoog Police Station ang padayon sa paghimo og imbestigasyon aron pagsikop sa suspetsado kinsa misibat human sa hitabo. (SVB)