SI MISAMIS Oriental Governor Yevgeny Vincente Emano mibutyag nga kon adunay magpositibo sa druga nga kawani sa Kapitolyo Probinsyal, taktakon kini.
“Of course terminate. Minimum termination. Basta druga wala na.”
Sa interbyu sa SunStar SuperBalita, gibutyag ni Emano nga usa ka random surprise drug testing ang gihimo niadtong Lunes, Nobyembre 12, human sa pagpakayab sa nasudnong bandila.
Gipili ang pangalan sa mga empleyado pinaagi sa pagbunot niini ug lakip si Emano bisan human niaging drug test nagboluntaryo sa pagpa-drug test.
Mokabat sa 45 ka mga empleyadong lalaki sa Kapitolyo Probinsyal ang nagpa-drug test sa buhatan sa Provincial Risk Reduction Management Department (PDRRMD).
Kini inisyatiba sa Provincial Administrator Office, HR Department ug Provincial Health Office.
Matud ni Emano nga paagi kini nga maayo ug limpyo ang pagpanarbaho sa mga trabahante sa kapitolyo nga layo sa ginadili nga druga.
Suportado sab kini sa kagamhanan sa gipakigbisogan ni Presidente Rodrigo Duterte nga war on drugs.
“Amo kini kanunay nga gimbuhaton ang random drug testing sa kapitolyo probinsyal uban sa pinili nga trabahante sa kapitolyo,” dugang niini.
Si Provincial Administrator Atty. Joy Matteo niingon sab sa SunStar SuperBalita nga niining 45 ka mga gipang drugtest nga empleyado duha niini ang wala diin usa ang absent samtang laing usa ang off sa iyang trabaho.
Apan gimandoan niini nga kung makatungha maghatod sa ilang urine sa buhatan sa Philippine Drug Enforcement Agency.
Ang budget niini moabot sa P400,000 nga gikuha gikan sa HR Department.
“Same process, terminated gihapon,” matud ni Matteo kung adunay magpositibo nga empleyado niining ika-duhang hugna sa drug test.