GIPUSIL ang polis sa duha ka lalaki human giprotektahan ang usa ka babaye sulod sa club Mojo sa Hayes St., ning siyudad sa Cagayan de Oro.
Nilanding sa Northern Mindanao Medical Center (NMMC) si Police Officer 2 Saturnino Gemenia, 35, minyo, taga Camp-Alagar, Lapasan ning siyudad ug nadestino sa Police Station 2 (PS2) sa Cogon human gipusil sa magsuon nga mao sila si Avarico Macaumbos, 16, ug Prince Ali, 18, taga Camella Homes, Upper Carmen ning siyudad.
Si Police Officer 3 Frederick Yane nibutyag sa Sun.Star Superbalita nga nahitabo ang insidente kagahapon mga alas 2:58 sa kadlawon sulod sa Club Mojo.
Sa inisyal nga imbestigasyon nasayran nga usa ka mananayaw sulod sa maong balay kalingawan ang nagpatabang human gihinol ang pribadong parte sa lawas sa duha ka mga suspetsado.
Niini si Gemenia nga anaa niadtong tungora isip kostumer ang nakamatikod sa hitabo ug isip polis nibadlong kini ngadto sa duha ka mga lalaki nga undangon na ang pagbinastos sa maong babae.
Sa pagtuong nagpatuo ang duha ka mga suspetsado kalmadong mikanaog si Gemenia sa ubos nga bahin apan kalit lang kining giatangan sa duha ug deretso nga gipusil. Naigo ang bukton ni Gemenia ug dili makasukol niadtong tungora labina nga off duty niini ug walay pusil nga dala.
Dali sab dayon nga miresponde ang Police Station 1 sa Divisoria ug nasikop ang duha ka magsuon, nakuha gikan kanila ang 9mm pistol ngaadunay sulod 24 ka mga buhing bala.
Gibalhog sa Maharlika Detention Cell ang 18 anyos nga si Prince Ali kinsa gitumbok nga maoy namusil ni Gemenia, samtang gidala sa Tahanan ng Kabataan si Avarico tungod sa edad niini.
Sa pagsulat ning balita, nakagawas na sa balay tambalanan ang biktima ug luwas na sa makuyawng kahimtang.
Samtang kasong violation of Comelec gun ban ug illegal possession of firearms ang kasong isang-at batok sa suspetsado. (Stephanie V. Berganio)