Lariosa: Kaplag 15

ANG BATHALAD (Bathalan-ong Halad sa Dagang), Sugbo mo-50 anyos na sunod tuig sa Agusto 25. Gitukod niadtong tuig 1969 ni magbabalak Dr. Mel Allego.

Usa ka literary movement nga gipangulohan og Tsirman nga si nobelista Lorenzo B. Canoy (PSK) ug kining maglilindog mao ang Co.Chairman.

Sa 1989, nahimong pormal nga asosasyon diin ang unang pamuno mao kining maglilindog. Si ambassador magbabalak Butch Bandillo mao ang ikaduha.

Sa sinugdanan mga sakop ang mga magsusulat sa Mindanao hangtod sa 2003 diin kada tuig magganayan sila pagtambong sa kombensiyon dinhi sa Sugbo.

Katulo ra mahitabo nga ang kombensiyon gihimo sa Bukidnon, Camiguin ug Iligan sa Mindanao. Sa 2004 nikab-ot og kaugalingnan ang Bathalad Mindanao.

Duha ka hugna ang kasaulogan sa Bathalad Golden Jubilee: sa Pebrero 25 nga tawgog Adlaw sa Magtutukod (Founder.s Day) ug sa Agusto 25 nga nganlag “Adlaw sa mga Pamuno (Presidents’ Day.)

Apan ang dakong kalihukan mao ang “ Kaplag 15 “- pagpasidungog sa 15 ka mga bantugang (Great) magsusulat magbabalak nga buhi sa Post-War Period nga iproklamar sa Pebrero 25.

Sa Agusto 25 iproklamar pud ang 10 Outstanding Young Writers sa millennial period. Ang duha ka pasidungog tawgog Don Vicente Sotto ug Don Vicente Ranudo Literary Excellence Award.

Ang “Kaplag 15” gisabak sa Palm Grass Cebu Heritage Hotel inabagan sa Bathalad Sugbo. Ang Palm Grass sukad sa pagkatuk od nag-atiman sa atong kulturanhong kabilin.

Ang mga basabalak sa Bathalad anha kanunayng ipahigayon sa Palm Grass Hotel nga andam modawat nga mapagarbuhon sa maong kalihukan.

Gisugdan na sa Bathalad ang pagdawat sa mga nominees sa “Kaplag 15 “ sa Sugbo gikan sa Visayas ug Mindanao. Ang nominasyon ipada nilang Rolando Morallo ug Lam Ceballos sa Superbalita, Cebu.