Rodel C. Nuñez

Maslog, Tabogon, Cebu

ALAS singko pa gani sa hapon nag-ilis na si Bernard. Maoy iyang gisul-ob ang T-shirt niyang puti nga may puntik-puntik nga pula.

Ug giparesan niya kinig karsones nga maong, ug sapatos nga goma.

Pulos imported ang iyang gisul-ob nga pinadala sa iyang igsuon nga tua magtrabaho sa gawas sa atong nasod.

Duna siyay gikasabot alang sa usa ka ‘date’ ning higayuna nga atol sa Valentine’s day nga adlaw sa mga managhigugmaay. Una kining higayon sa iyang pakig-date og uyab, kay sukad-masukad karon pa man siya makasulay og panguyab.

Click here for stories and updates on the Sinulog 2010 Festival.

Ang nakanindot ra ba kay kining iyang ika-date karon wala pa gayud niya makita sa personal. Nauyab niya kini pinaagi sa selpon. Nakit-an niya ang larawan niini diha ra gihapon sa selpon kay may video camera man ang iyang selpon, ingon man ang selpon sa iyang nauyab.

Joy ang pangalan sa iyang uyab. Pupareho usab kini kaniyag pangidaron, kay desi-siyete anyos man sab kini sama kaniya.

Nagtungha kini sa kolehiyo sa kursong narsing. Ang iya ni Bernard kay Information Technology.

Ginamit ang ilang mga selpon pinaagi sa teks nagkahibaw-anay sila si Bernard ug ang iyang uyab kon asa silang dapita sa Fort San Pedro magkita. Nahibaw-an ni Bernard nga ang isul-ob ni Joy mao ang usa ka blawos nga puti, nga binurdahan og pula nga kasingkasing sa walang dughan niini.

Diha pa gani sa sulod sa taksi naghinamhinam na si Bernard nga ikahimamat sa personal ang iyang uyab. Nagsige siyag handuraw sa larawan ni Joy nga iyang nakita sa iyang selpon.

Samtang nagdagan ang taksi iyang giplanong daan kon unsay iyang buhaton kon mag-abot na sila si Joy. Gikan sa Fort San Pedro mangaon sila si Joy sa usa ka restawran. Pagkahuman, manan-aw silag sine. Ug kon mosugot si Joy, manulod silag usa ka motel.

Dali ra nga natultolan ni Bernard ang nahimutangan ni Joy, diha sa dakong hawanan sa kuta. Layo-layo pa gani nailhan na ni Bernard si Joy, tungod sa gisul-ob niini.

Mainiton kaayo ang paghimamatay sa duha kay human magkailhanay, nagginaksanay dayon sila. Wala lang gani nila baleha nga dunay ubang mga tawo diha sa ilang duol nga nagtan-aw sa ilang gibuhat.

“Kahumot gyud nimo, Joy!” ni Bernard dihang nanglingkod na sila sa sementadong lingkuranan.

“Kaguwapo diay nimo sa personal, Bernard…” pinaluray nga pulong ni Joy nga mihalok sa mga ngabil sa lalake.

Taudtaod gayud ang panag-ukobay sa ilang mga ngabil.

Nagtinupsanay pa sila sa ilang mga dila, daw gipanguhaw pag-ayo.

Samtang nagpadayon sila paghinagkanay, nagpanghiram ang mga kamot ni Bernard sa pipila ka bahin sa lawas ni Joy. Mikiriw ang iyang mga kamot; may gipangita.

“Ayaw diha, Bernard, kay gilok!” ni Joy nga nanagang sa iyang kaugalingon aron di mahikapan sa lalake ang mutya niyang tinipigan.

Apan wala magpapugong si Bernard hangtod milampos siya sa pagsagpo sa butang nga gitipigan ni Joy diha sa bilahan niini.

Unya kalit nga miurong si Bernard. Nakahinol siya og usa ka butang nga tuskig apan humukon. “Joy, unsa ni?”

“Mao na!” pinaluray nga tubag ni Joy nga naggakos gihapon kang Bernard.

Milugak paggakos si Bernard. Mitindog ug milakaw nga walay lingi-lingi. (KATAPUSAN)