Carmelo D. Lariosa
Panadtaran, San Fernando, Cebu
KADA adlaw iya gyung handumon si Samson, kay mao ra kining paagiha nga mahupay ang iyang kamingaw sa lalake nga iyang gihigugma. Apan nganong wala na man kini mopauli sa ila? Nganong wa na man siya hatagig importansiya sa binuhat nga maoy nakaangkon sa kaputli sa iyang pagka bulak? Ang ilang pagminahalay ni Samson nagbunga na karon, ug kining maong binhi nga migitib na karon sa iyang sabakan nagkinahanglan og amahan sa higayon nga ikahimugso na kini niya sa kalibutan. Apan hain lagi si Samson? Naghandom ba kaha sab kini kaniya sama sa iyang gibuhat? Apan wa siya magpakawala og paglaom nga balikan siya ni Samson.
“Dili na kadto si Samson mobalik kanimo, uy, Adora. Kon buot pa siyang mobalik, dugay ra unta. Lima na ka tuig ug magsige lang gihapon kag handom niya? Hoy, alang sa imong anak, ayaw na kadtog handuma! Yabag ug kuwanggol tong dako!” taas ang tingog ni Auring nga namulong. Inahan siya si Adora ug sakit usab sa iyang buot nga magtan-aw sa iyang anak sa ingon niining kahimtang, nga nag-antos pagpadako sa anak niini.
“Apan, Nay, misaad si Samson nga iya kong balikon basta makatrabaho na siya didto sa Manila,” ni Adora ng kahilakon.
“Balikon god tawon! Ayaw na lagi to siyag hunahunaa kay dili na to mobalik. Kinahanglan nga imong dawaton nga nahimo kang inahan nga way bana!” gibundak ni Auring ang iyang tingog, dayong sulod sa ilang kusina.
Naningkamot na lang si Adora sa iyang kaugalingon. Ang iyang anak nga batang lalake nahimo niyang inspirasyon sa iyang pagpanikaysikay sa kinabuhi. Naninda siya, naningkamot. Ug hinayhinay sab nga nagkahanap sa iyang panumdoman si Samson. Naglagot na siya niini ug ang kaligutgot mihingkod ngadto sa kasilag. Dili na siya buot mohandom adtong lalake nga way kaluoy sa babaye nga sama sa bulak iyang gitupsan ug gipahimuslan.
Miasenso si Adora tungod sa iyang kakugi ug si Dindo, ang iyang anak, bayong-bayong na ug anaa na sa ikaunom nga ang-ang sa elementarya.
Unya, usa ka hapon niana may lalakeng miduol kaniya. Hugaw kaayog pamisti ang lalake ug nakaila dayon siya niini, si Samson. Daot na kaayo kini ug ingon sa way kaon. Wala niya tagda. Gisangpit siya niini.
“Adora, Adora, ayaw paglakaw. Ayaw ko biyai!” matod sa lalake. Apan anaa pa sa iyang kasingkasing ang kaligutgot sa pagbiya niini kaniya. Ug karon mibalik kay puwerte nang paita sa kahimtang, nagpakiluoy.
No, no. no! Wa na koy gusto nimo, Samson! ni Adora sa hilom. Ug patay na sab ang gugma ko kanimo! Ug gikusog niya pag-sera ang pultahan. Milanog ang pagpaka niini. Dinhi sa sulod sa iyang balay dili na niya paminawon ang tingog ni Samson nga nagpanawag kaniya. Dili na. Mao na kini ang tumoy sa iyang pagpaabot: ang pagbalik ni Samson nga giayran na sa iyang gugma. (Katapusan)