MAKIGPARANG ang Muay Thai fighters sa Team Cebu City sa pipila ka dekalidad nga kickboxers sa nasod sa National Muay Thai Championships nga ipahigayon karong Nobiyembre 15-20 sa Multi-Purpose Arena sa Philsports Complex sa Pasig City.
Ang torneyo nagsilbeng basihan sa pagpili og mga miyembro sa Philippine team nga mokombati sa nagkadaiyang international tournaments lakip na ang 2019 Southeast Asian Games.
Malaumon si Muay Thai Association of the Philippines-Visayas head Master Benigno ‘Ekin’ R. Caniga Jr. sa poruhan sa Team Cebu City human malampuson niining kampanya sa Batang Pinoy National Finals sa miaging buwan sa Baguio City.
“Human sa Batang Pinoy, wala’y hunong ang ilang training. Atong ipadala ang atong promising fighters. Sa akong tan-aw, maka-fight gyud ta sa top kickboxers sa nasod,” matod ni Master Ekin.
Moabot sa 13 ka fighters sa Team Cebu City ang moasdang sa Manila nga pangulohan sa pag-umangkon ni Master Ekin ug Batang Pinoy double-gold medalist Andrie Caniga ug sa beteranong si Roel Rosauro.
Ang ubang mga sakop sa Team Cebu Cuty mao sila si Radel Dela Cerna, Mark Alforque, Ulysses Martinez, Uchenna Onunkuso, Augustine Antiporta, Allan Albindo, Amocesar Petallana, Jhon Simbahon, Buel Algono, Rey Velasco, ug Reymond Berandoy.
Molarga ang grupo karong adlawa paingon sa Manila.
Sa laing bahin, nagkanayon si Master Ekin nga mas nadasig siyang palapdan ang grassroots program sa Muay Thai sa Sugbo tungod kay posible na kining maapil isip Olympic sports sa ugma damlag. ESL