GAWAS sa kalapasan sa Forestry Law, laing kaso sa kalapasan sa Fishery Law ang gikatakdang ipasaka sa City Environmental and Natural Resources Office (Cenro) batok sa usa ka seaman nga nasakpang nitambak sa bakhawan sa Barangay Paknaan, Mandaue City niadtong Nobiyembre 12.
Nagtingkagol sa Basak Police Station si Manuelito Gitgano, 38, human giingon nga naaktuhan nga nangtambak og filling material sa bakhawan sa Zone Sibuyas, Barangay Paknaan.
Matod ni Police Senior Insp. Rodgene Fudotan, nakadawat sila og tawag gikan sa legal counsel sa DENR-7 Cenro, Jovelito Colot, nga aduna silay na-citizen arrest.
Giangkon ni Gitgano ang gihimo. Matod niya nga gamit ang L300 nga sakyanan nga maoy gikargahan sa mga filling materials, iyang gitambakan ang parte sa lugar sa tinguha nga himuan niya og kapilya sa Sr. Sto. Niño.
Iya kining pagtuman sa panaad human sa kamatayon sa usa sa iyang anak sa 2014.
“Kahibalo ko nga timberland to, pero igo ra man gud nako gipangbutangan og bato ang tubig sa dapit. Wa koy giputol nga kahoy, para ra man makapatindog ko og kapilya, para sa namatay nako nga anak,” pangangkon ni Gitgano.
Gikatakdang ipasaka nga kaso mao ang kalapasan sa sec. 78 sa Presidential Decree Mo. 705, kun kalapasan sa Forestry Law.Ang Forestry Law usa ka balaod sa kalapasan sa pagpamutol ug pagtukod og imprastraktura sa bakhawan nga lugar ug timberland.
Ang assitant OIC sa Mandaue Cenro, Placido Jerusalem, nitug-an nga kagahapon sa buntag lang sila nasayod sa pagkasikop ni Gitgano.
Nakig-alayon sila sa DENR-7 Cenro aron sa pag-asses sa maong panghitabo kay usa sa ila usab nakita nga kalapasan ang diha sa Fishery Law.
“Konbase sa iyang pangangkon, posibleng anaa sad kini violation sa RA 10654 sa section 99, ang unlawful to anyone to convert the mangrove area into a fishpond or any other purposes. Ato i-assess ug tun-an kay sa Mandaue man sad ni nga dapit,” matod ni Jerusalem. FMD