ANG patrol car sa Basak Police Station sa dakbayan sa Mandaue naanakan samtang naghatod og mabdos padung sa Ouano Hospital sa dakbayan sa Lapu-Lapu.

Ang non-uniformed personnel (NUP) sa Basak Police ug driver nakatabang usab sa pagpanganak. Luwas nga na-turn over ang inahan ug masuso sa tambalanan niadtong Lunes sa udto, Nobiyembre 12.

Apan alang ni PO1 Elmer Gonzales, Josie Tejano ug Elmor Ceniza, sila ang swerte kay nakatabang sila sa usa ka masuso nga babaye nga luwas ra nga napanganak sa iyang inahan.

Si Jackilyn Branzuela, 32, ug ang iyang igsuon nga si Lawrence Oliver gihunong sa usa ka taxi sa gawas sa Basak Police Station pasado alas 11 sa buntag.

Gipatabangan sila nga mapadali og hatud sa ospital tungod usab sa kahuot sa trapiko. Si Branzuela nireklamo sa kasakit na sa iyang tiyan.

Ang magsuong Branzuela nihangyo nga magpahatod sa Ouano Hospital diin siya naka-package alang sa iyang pagpanganak.

Matod ni Gonzales, human usab nimando ang ilang hepe, Sr. Inspector Rodgene Fudotan, nga daling ipada si Jackliyn bisan kon wa na kini masakop sa hurisdiksyon sa Mandaue City Police, dali nila gisakay sa patrol car 329.

Nanganak

Sa dihang nakalabang na sila sa Marcelo Fernan Bridge, wa na nakapugong si Jackilyn, niutong na kini.

Maayo nalang kay si Tejano usa ka registered nurse, kinsa nitabang sa inahan sa pag-utong hangtod nga nanganak.

Matod ni Fudotan, babaye ang gihimugso nga bata sud sa ilang patrol car.

Samtang ang panyo ug jacket nga gipahid ug giputos sa masuso, iya sa driver nga si Ceniza, kinsa 20 na ka tuig nga job order employee sa Mandaue City Hall.

Alang nilang tulo nga susama og pinaskuhan na nga nakatabang sila sa mag-inahan.

“Wa ko kasabot sa akong gibati nga nakita nako nga nigawas ang bata, labi na paghilak. Nalipay ko, nga lami kaayo sa pamati nga makatabang ka ba sa ingon-ani nga paagi, makatabang ka sa uban nga alang nila dako na kaayo gyud nga problema. Kami ang na-swertehan,” asoy ni Gonzales sa Superbalita Cebu.

“Happy... blessed kaayo ko, kami, ang among police station,” malipayon nga pamahayag ni Tejano.

Si Fudotan mapasalamaton usab nga daghan ang nagpakita og pagsalig kanila sa kapulisan, sama sa taxi driver nga maoy naghatod sa mabdos ug sa igsuon niini ngadto sa ilang police station, diin nangayo og pakitabang.

Matod sa hepe nga pagpakita usab kini nga sila sa kapulisan, di ra kutob sa pagpatuman sa kahapsay ug kalinaw kundi andam usab sila sa bisan unsang serbisyo nga ilang mapadangat sa katawhan.

Si Branzuela naa karon sa Our Lady of the Rule Maternity and General Hospital sa Pajo, Lapu-Lapu City.