ISUGYOT kuno ni Secretary Eduardo Año sa Department of Interior and Local Government (DILG) ngadto kang Presidente Rodrigo Duterte nga dili tugotan nga mokandidato alang sa nagkadaiyang posisyon sa nasud ang mga politiko kansang mga pangalan naapil sa narco-politicians sa nasud.
Maayo ang tumong ni Año nga unta mga maayong tawo lang ang angay sangunan sa katungdanan labi na sa pagdumala sa mga ahensiya sa gobyerno; mga tawo nga dili hiwi ang panghuna-huna kay nadaut sa druga. Apan daghan pa ang proseso nga agian aron mapugngan ang usa ka Pinoy nga mokandidato tungod duna tay Batakang Balaod nga maoy basehanan sa mga puwede ug dili angay buhaton alang sa atong isigkatawo.
Bisan sa dakong pagduda nga si Pulano nalambigit sa ilegal nga druga, dili kini mahimong hinungdan nga magpugong kaniya nga mo-file sa iyang kandidatura kay kon walay kaso nga napasang-at sa korte ug nahukman siya nga sad-an sa paglapas sa maong balaod walay makapugong kaniya.
Ang mga pagduda sa iyang pagkatawo magpabilin nga hugon-hugon lang nga puwedeng buhaton sa iyang makaatbang aron wala nay kontra.
Dili man unta bugo si Sec. Año nga wala siyay hanaw sa balaod kay nahimo siya kanhi nga chief of staff sa Armed Forces of the Philippines una siya nahimong head sa DILG.
Hinuon gubat ang kanunay ginaatubang sa mga kasundalohan, lahi kay sa mga pulis nga tigpatuman sa balaod.
Dapat mandoan ni Año ang kapulisan nga dalion ang ilang pagpangita'g ebidensiya aron mapasakaan og kaso bisan kinsa nga gidudahan nga naapil sa listahan sa mga narco-politicians; dalion ang pagtaral kanila sa korte aron dili na puwede makakupot og posisyon sa gobyerno.
Dili ko supak nga puphuon ang mga nagapayuhot sa illegal drugs, apil ang mga nagapaluyo nga mga opisyal sa gobyerno apan angayan lang sab nga magsubay ta sa insakto nga proseso.