DIGOS CITY -- Nahurot og kamatay ang usa ka pamilya nga sakay sa traysikel human gidaro sa depasaheroang bus, alas 6:20 sa buntag Miyerkules, Nobyembre 14.
Nahitabo ang insidente sa entradang bahin sa Barangay Cogon, pasulod sa dakbayan sa Digos.
Nailhan ang drayber sa Mindanao Star Bus nga si Fermi Macalos, taga Batasan, Makilala, North Cotabato.
Samtang ang mga nangamatay mao sila Joel Castro, 32, amahan kinsa drayber sa traysikel, Honey Grace Castro, 27, Cyril Castro, 7, Joana Clair Castro, 4, Pedo Castro, 2, ug usa ka Floro Ocbenaria, 50, taga Miranda Village, Barangay Zone 3, Sta. Cruz, Davao del Sur.
Ang bus, nagbaton sa plakang ACX 7823, padung sa Cotabato City.
Sa nakalap nga taho sa SunStar SuperBalita, giingong gikan sa dakbayan sa Digos ang traysikel ug padung sa lungsod sa Sta. Cruz, nga pulos magkapamilya ang sakay.
Anaa na sa kustodiya sa kapulisan ang drayber sa bus aron manubag sa salaod nga nahimo.
Una nang gimando sa Department of Interior and Local Government nga hugtanong gidili sa national highway ang pagdagan sa mga traysikel. (Orlando B. Dinoy)