NAKAPIYANSA ug temporaryong nahatagan og kagawasan gikan sa pagkustodiya sa Criminal Investigation and Detection Group (CIDG) 11 human boluntaryong mitahan sa kaugalingon sa kasong kurapsyon si Island Garden City of Samal (Igacos) Ex-Mayor Aniano Antalan.
Duha ka mga kaso ang giatubang sa kanhi mayor sa isla sa kasong kalapasan sa Sec. 3 b sa Republic Act (RA) 3019 o Anti-Graft and Corrupt Practices Act ug kalapasan sa Art. 211 sa Revised Penal Code of Indirect Bribery.
Subay sa kompermasyon ni CIDG-Davao City Field Unit (DCFU) Chief Inspector Milgrace Cajes Driz nga boluntaryong mitahan si Antalan sa CIDG-DCFU Martes sa buntag gumikan sa pag-atubang niini sa duha ka mga kaso.
Nasayran nga ang order de aresto batok sa kanhi mayor gipagula sa 17th Division sa Sandiganbayan sa Quezon City.
Dugang nasayran nga ang kaso nag-ugat sa gipirmahan nga memorandum of agreement (MOA) tali sa lokal nga kagamhanan sa Igacos diin si Antalan pa ang mayor tali sa usa ka kooperatiba sa maong lugar kauban ang usa ka partylist na grupo.
Alegasyong midawat si Antalan og cash gift gikan sa kooperatiba nga hugot usab niyang gipanghimakak.
Depensa ni Antalan nga moatubang gayud siya sa korte ug iyang pamatud-an nga walay kamatuoran ang tanan ug pulos lamang kini gipahid kaniya.
Nagtuo sab ang kanhi mayor nga bunga kining tanan sa init nga politika sa Isla gumikan nasayran nga mopapili pag-usab si Antalan isip mayor sa Igacos karong mid-term elections.
Sa kasamtangan, nahimong gawasnon si Antalan sa mga kaso ug iya kining pamatud-an sa korte nga pulos bakak ang maong mga pasangil ngadto kaniya.