MOABOT ngadto sa 24 ka mga barangay sa dakbayan sa Sugbo, labi na ang kabukiran, ang ningsalmot sa matag tuig nga kasaulogan Farmer’s Day nga gipasiugdahan sa Cebu City Government.
Ang pangulo sa City Agriculture Department (CAD) nga si Apple Tribunalo nihulagway nga ang adlaw sa mga mag-uuma karon maoy labing nindot diin adunay upat ka kategoriya ang giapilan sa mga barangay.
Nahimong kampyon sa float category ang Barangay Malubog, gisundan sa Barangay Guba ug ikatulo ang Barangay Taptap.
Nipatigbabaw usab ang Barangay Pamutan sa booth display, ikaduha ang Barangay Adlaon ug ikatulo ang Barangay Tabunan samtang champion ang Barangay Busay sa flower arrangement.
Si Tribunalo niingon nga gituyo sa siyudad ang maong matang sa kalihukan aron usab pag-ila sa kamahinungdanon sa papel nga ilang gihuptan sa komunidad ug ang pagsubasta sa ilang mga abot gikan sa pag-uma sa kabukiran.
Atol sa contest kagahapon, ang mga farmer gikan sa bukid nibaligya sa ilang produkto sama sa saging, mangga, talong ug ubang prutas ug utanon sa presyo nga kaya sa bulsa.
Ang Cebu City adunay di mominos 14,000 ka mga mag-uuma kansang panginabuhi nagsalig sa abot gikan sa tanom nga ilang giugmad.