PALO, LEYTE--Gidayeg sa deputy inspector general sa Philippine National Police Internal Affairs Services (PNP-IAS) ang Police Regional Office (PRO) 8.
Kini tungod sa dali nga pagresolba sa mga administrative cases batok sa gipangkasohan nga mga pulis sa rehiyon.
Si Police Director Leo Angelo Leuterio, deputy inspector general sa PNP-IAS, gidapit sa usa ka kalihukan sa PRO 8.
“PRO 8 has the highest resolution of administrative cases especially anti illegal drugs operation,” matod ni Leuterio.
Sa miaging buwan, gipamahayag sa PRO 8 nga dunay kapin 20 ka mga pulis sa rehiyon ang gipaubos sa imbestigasyon gumikan sa nagkadaiyang pasangil.
Dugang ni Leuterio, dako usab og tabang ang publiko sa pag-report sa mga badlungon nga pulis.
Ang publiko mamahimo nga magpadala og mensahe sa kapulisan kon dunay makita nga di maayong binuhatan ang usa ka pulis.
Matod ni Leuterio, bisan pa og di magpaila ang mosumbong, ila gihapong ipaubos sa beripikasyon ang report.
Nisaad usab si Leuterio nga aksyonan gilayon sa IAS ang mga kaso nga isang-at batok sa gipasanginlan nga pulis. JKDP