PALO, LEYTE--Kinse ka wanted persons ang nasikop sa kapulisan sa Eastern Visayas sud sa usa ka adlaw.
Ang Samar Police Provincial Office (SPPO) nakasikop og unom sa duha ka mga operasyon.
Ang Leyte Police Provincial Office (LPPO) nakasikop og lima ka wanted persons sa lima ka operasyon.
Samtang tag usa ang nasikop sa Southern Leyte, Eastern Samar, Ormoc City ug Tacloban City.
Nagkadaiyang mga kaso ang giatubang sa mga nasikop sama sa kalapasan sa Omnibus Election Code, acts of lasciviousness, murder, robbery ug uban pa.
Matod ni Police Regional Office (PRO) 8 Director Dionardo Carlos, dako nga tabang sa pagmintenar sa kahapsay ug kalinaw ang pagkasikop sa mga wanted.
“To apprehend these fugitives in our society is our main goal to attain a better community,” matod ni Carlos.
Dugang ni Carlos, lauman pa ang sunod sunod nga pagsikop sa ubang wanted persons sa umaabot nga mga adlaw.
Ang mga nasikop gipangdala sa mga police station sa mga lugar diin sila nakasala. JKDP