Family driver gipusil, patay

USA ka family driver sa Barangay Cubacub, Dakbayan sa Mandaue namatay diha-diha human kini gipusil sa usa sa duha ka mga lalaking naka-motorsiklo Miyerkules sa hapon, Nobiyembre 14.

Si Vir Pelare, 48, taga barangay Casili, sa Lungsod sa Consolacion nakaangkon og samad pinusilan sa ulo hinungdan sa iyang hinanaling kamatayon.

Gitug-an ni PO2 Ryan Diamada, imbestigador sa Canduman Police Station, nga nadawat nila ang alarma sa pagpamusil sa Purok 2 ala 1:20 sa hapon.

Matod ni Diamada nga kay way lakaw, nagtambay si Pelare sa usa ka karenderya sa gawas sa panimay sa iyang amo.

Kalit lang adunay nihunong nga nagmotorsiklo diin ang angkas niini diretsong nipusil kang Pelate kaduha ka higayon. Nisibat dayon ang mga killer.

Nakuha sa crime scene ang duha ka empty shells ug usa ka slug.

Matod ni Diamada nga base sa estorya sa mga nagpuyo sa maong lugar nga way kontra si Pelare kay maayo nga tawo.

Wa usab sa ilang drug watch list sa Canduman Police station ug sa barangay ang biktima.

Makig-alayon ang MCPO sa Consolacion Police Station aron pagsuta sa background ni Pelare aron matumbok kinsa ang mamumuno. FMD

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph