KAPIN sa 20 ka mga barong-barong nga anaa sa su’d sa Cebu International Convention Center (CICC) sa dakbayan sa Mandaue giguba Miyerkules sa buntag, Nobiyembre 14.
Ang mga nanagpuyo sa barong-barong nibahad nga kon pugos sila nga pagawason sa compound, sa Mandaue city hall sila mangatug.
Bisan sa kanunay nga pagyawyaw sa mga nanagpuyo sa mga barong-barong, gihimo ang clearing operation sa mga sakop sa Housing and Development Office.
Gitug-an ni Atty. James Sayson sa Mandaue City Legal Office nga ang kapin sa 20 ka mga barongbarong nga giguba mao na lang ang nahibilin sa 275 ka mga pamilyahan nga wa sa listahan sa mga benipisyaryo sa relocation site sa Barangay Casili.
Wa’ sila malakip kay kasagaran kanila mga nanag-abang ug extended family sa mga biktima sa sunog niadtong 2016 sa Guizo ug Mantuyong.
Ang uban usab kanila nanagpuyo kaniadto sa may Mahiga Creek.
Dugang ni Sayson nga adunay pipila sa mga nipuyo mga sakop sa walhong pundok.
Apan tiyabaw sa usa sa nagpuyo nga si Josela Golisao nga relokasyon ang ilang gipangayo.
Iyang giangkon nga gitanyagan sila og pinansyal nga hinabang apan wa nila dawata.
Matod niya nga lakip siya sa nasunugan, kinsa sukad pa 1979 nga nagpuyo sa Barangay Guizo.
Gitug-an ni Sayson nga pagawason ang maong mga nanagpuyo sa gipangguba aron kadtong 288 na lang nga anaa sa listahan ang magpabilin samtang nagpaabot sa pagbalhin nila sa relocation site sa Barangay Casili sa Enero sunod tuig.
Apan bahad sa grupo nga di buot mopahawa sa CICC compound nga kon pugos sila nga papahawaon, sa Mandaue City hall sila mangatug.
Hinungdan usab ang kapulisan sa Mandaue City Police nagpatrolya sa palibot sa City hall. FMD