NIABOT na sa 20 ka mga bata nga naturokan sa anti-dengue vaccine nga Dengvaxia ang kompirmado nga patay sa Sugbo.
Gikompirmar kini sa pangu sa Regional Epidemiology Surveillance Unit (Resu) 7, Dr. Shelbay Blanco.
Natala nila ang uwahing patay nga naturokan sa Dengvaxia niadtong Agusto.
Subay usab niini gikompirmar sa Public Attorney’s Office (PAO) nga pito ka mga patay nga gikan sa Sugbo ang nipasaka na og kaso batok kang kanhi Health Secretary Jannette Garin.
Sa nanggawas nga taho, gipasaka niadtong Oktubre 30 ang kaso ngadto sa Department of Justice.
Lakip sa mga kaso nga gipasaka mao ang reckless imprudence resulting in homicide ubos sa Article 365 sa Revised Penal Code; torture resulting in death ug torture of a child ubos sa Republic Act 9745, kalapasan sa Presidential Decree 1829 o ang obstruction of justice, kalapasan sa Republic Act 3019 o ang Anti-Graft and Corrupt Practices Act.
Sa Sugbo lang, aduna’y 162,000 ka mga bata ang nahatagan sa maong bakuna.
Samtang 4% nga ubos ang kaso sa dengue sa Central Visayas sukad Enero ning tuiga hangtod Nobiyembre 10.
Niabot sa 12,682 ka mga kaso ang natala samtang 85 ang patay.
Itandi sa 12,187 ka mga kaso ug 105 ka patay sa susamang petsa niadtong 2017.
Giisip nga usa ning Dengvaxia nga labing kontrobersyal nga vaccine sa nasod diin miresulta sa pagkahadlok usab sa ubang ginikanan nga matagaan og laing bakuna ang ilang mga anak. HBL