GITINGUHA nga sa di pa matapos ning tuiga, mo-operate na ang unang 100 ka electronic jeepney (e-jeepney) sa kadalanan sa dakbayan sa Lapu-Lapu.
Ang chairman sa United Drivers/Operators Transport Cooperative (Udotco) Malvin Arias nipahibawo nga ang ilang kooperatiba maoy gihatagan og katungod sa Land Transportation Franchising and Regulatory Board (LTFRB) ingon man sa Cooperative Development Authority (CDA) nga modumala sa maong e-jeepnies.
Ang units gihulagway nga environment-friendly gumikan kay solar powered samtang ang battery mamahimong i-charge sa naandan nga electric source.
Gipahibawo ni Arias nga motukod pa sila og charging station sa parking area sa tricycle units diin nahimutang sab ang buhatan sa Udotco sa Barangay Poblacion.
Nisaad si Mayor Paz Radaza og laing area alang sa ika-duhang charging station.
Gipasabot sa opisyal nga gamay ra ang kunsomo sa kuryente nga magamit sa maong sakyanan base sa ilang pagtuon atol sa test drive.
Nasuta nga di molabaw sa 10 kilowatts aron ma-fully charge ang usa ka battery.
“Mora lang kag nagpuno og P50 sa imong electric bill,” saysay ni Arias sa dihang nahinabi sa Superbalita Cebu.
Samtang ang drayber ug konduktor nga mogamit sa unit sa pagpamasada gikinahanglan nga sakop sa Udotco ug mipaubos sa seminar kabahin sa pag-operate sa E-jeepney.
Ang drayber ug konduktor mokita di base sa ilang pagpamasahero, apan inadlaw ang ilang suholan.
Aduna sab silay benefits sama sa social security, Pag-ibig ug Phil Health.
“Above minimum ang makubra sa drayber P450 ngadto nga sa P500 ang adlaw, samtang minos lang dyutay ang sa konduktor,” asoy sa coop chairman.
Sa matag unit, 8-hour shift ang mga drayber nga mo-operate sa 20–22 seating capacity nga E-jeepney sa matag adlaw inubanan sa ilang konduktor.
Rota nga subayon manukad sa merkado publiko sa Poblacion, subay sa M.L. Quezon Highway lahos sa barangay Pusok, Ibo, Buaya, Mactan, Maribago, Agus, Marigondon, Basak balik sa merkado.
“Kon pilay pletehan sa mga pasahero ngadto sa traysikol (base sa destinasyon), parehas ra sa e-jeepney,” matod ni Arias.
Ang matang sa transportasyon kabahin sa pagpatuman na unya sa transport modernization program ni Presidente Rodrigo Duterte nga gipaagi sa Department of Transportation (DOTr).
Si Radaza kinsa suportado ang maong programa nipasabot nga sa maong paagi anam nang wagtangon ang mga traysikol unit sa dakbayan nga adunay gidugayon nga 15 ka tuig pataas.
Iyang gitumbok ang mga traysikol nga usa sa hinungdan sa kahuot sa dagan sa trapiko sa pipila ka mga karsada sa Lapu-Lapu.