SECTIONS
Sunday, December 16, 2018
SUPERBALITA CEBU

Pulis gipusil, patay

Gipatay. Nagbuy-od ang lawas ni PO2 Lord Romyth Cañada human kini rakraki sa wa pa matinong gidaghanon sa armadong mga tawo kagahapon sa Miyerkules sa buntag sa lungsod sa Minglanilla. Dead on arrival si Cañada sa ospital. Ang iyang bayaw (nagbarog sa likod) nagarasan sab sa agtang. (Amper Campaña)

PULIS nga taga lungsod sa Minglanilla gipusil patay sa wa mailhing mga tawo alas 10:50 sa Miyerkules sa buntag, Nobiyembre 14, sa may Sitio Lower, Barangay Calajoan, lungsod sa Minglanilla.

Ang lawas ni PO2 Lord Romyth Cañada, 38, taga Sitio Bacay, Barangay Tulay, Minglanilla natusaktusak sa mga bala.

Ang iyang bayaw nga si Ken Echavez, 36, kinsa iyang kuyog atol sa hitabo, nakaangkon og garas sa kilay ug bukton.

Si PO2 Jefferson Base, sa Minglanilla Police Station nga nahinabi sa Superbalita Cebu, nagkanayon nga si Cañada nagpaayo sa iyang sakyanan sa usa ka shop sa nahisgutang dapit.

Niabot ang itom nga sakyanan sa mga killer, nihunong samtang gipalusot ang sumbohan sa armas dayon paarak tumong kang Cañada.

Matod sa usa ka saksi kinsang ngan gipugngan ning mantalaan, nagbarog sila sa daplin dihang nakadungog sila og mga buto sa pusil.

“Nitukod siya (Cañada) nganha mao to natumba siya nya gitiwasan,” asoy sa saksi.

Di makatino ang saksi kon pila ang sakay sa sakyanan, apan matod niya nga usa lang ka armas ang iyang nakit-an.

“Tabang mi og duotduot nganhi para maplastar sa lugar kay maikog man ta sa kalsada. Pagkahuman, taodtaud nipaka ang buto. Tupad ming duha. Kaingon ko na maapil ko ato. Taod-taod naay awto nihunong wala nako kahibaw unsay color ato,” matod sa saksi. Ang mga sakyanan sa kustomer nangabuak ang bildo.

“Ang iyahang bayaw (Echavez) gitabangan siya. Nya gikuha ang armas sa iyahang bayaw nya mao to nibalos, nya wala man kabuto,” dugang sa saksi.

Daling gidala ang pulis sa South General Hospital, apan gideklarar nga dead on arrival.

Matod sa saksi nga naaberiya ang sakyanan ni Cañada hinungdan nga ilang gipapaayo ang sakyanan sa shop.

Gibalhin

Si Chief Inspector Verniño Nosirale, hepe sa Minglanilla Police Station nga nahinabi sa Superbalita Cebu, nagkanayon nga wa pa nila masubay unsay motibo sa krimen.

Wa pa nila mahibaw-i kon pila ka buok ang mga killer ug unsa ang gisakyan.

Ila pang tinuon kon tinuod bang nagkaestorya pa sila si Cañada ug ang gunman sa wa pa ang hitabo. Matod niya nga dunay saksi nga nitumbok nga nagpakiluoy pa ang pulis sa gunman, apan kini wa pa nila makompirmar unsa ka tinuod.

Si Nosirale niingon nga ila pang tinuon kon duna bay CCTV sa lugar.

Sumala pa niya nga nanguha pa sila og dugang kasayuran sa profile ni Cañada, kinsa kanhi sakop nila sa Minglanilla niadtong 2016 apan nabalhin sa Regional Police Holding Admin Units (RPHAU-7) niadtong 2017 tungod sa kasong neglect of duty.

Sa wa pa madestino sa Minglanilla, gibutang si Cañada sa Boljoon Police Station.

Gipasabot ni Nosirale nga bag-uhay lang siyang nahepe sa kapulisan sa Minglanilla hinungdan nga gipaabot pa nila ang case folder sa biktima.

Pinaagi niini, ilang masuta ang status ug uban pang records ni Cañada gikan sa Cebu Provincial Police Office (CPPO).

“Si PO2 Lord Romyth Canada former sakop siya sa Minglanilla police station before gi transfer siya sa PRO-7 sa Base police since 2016 na relieved nani siya sa Minglanilla and re assigned sa PRO-7,” kompirmar ni Supt. Jannete Rafter sa CPPO.

Usa ka kasaligang tinubdan sa CPPO nagkanayon sa Superbalita Cebu nga naa sa listahan sa mga narco cops si Cañada nga maoy usa sa hinungdan nga kini gipalagpot sa katungdanan.

Apan matod ni Rafter nga ila pa kining ipaubos sa imbestigasyon ilabi na nga way kaso nga gipasaka ang Police Regional Office (PRO 7) kaniya kon tinuod nga naa kini sa listahan sa mga pulis nga nalambigit sa illegal nga drugas.

Nisulod sa serbisyo sa pagka pulis si Cañada niadtong 2008 sigun sa records sa Personnel Division sa PRO 7.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!