WALA’Y nakita ang Cagayan de Oro City Price Coordinating Council (CDO-CPCC) nga mga retailers nga nakalapas sa gipatuman nga Suggested Retail Price (SRP) sa bugas sa gipahigayong inspeksiyon sa merkado sa Carmen ning siyudad.
Gihimo ang pagsusi pinangulohan ni abigado Jose Edgardo Uy, co-chairperson sa CPCC human sa mga reklamo nga adunay mga retailer nga wala nagtuman sa SRP sa unang adlaw sa paglusad niini sa Cogon niadtong Nobyembre 9, 2018.
Matud ni Antonio Resma Jr., nga wala silay nasapon nga nakalapas sa maong pagpatuman sa balaod atol sa inspeksiyon.
“Generally okay ang atong observations, nag comply na ang mga rice retailers sa SRP and kadtong standard signs, maayo na kaayo kay nag meeting man diay sad ang NFA and ang mga rice traders the other day,” pahayag ni Resma.
Padayon karon ang monitoring sa CPCC dili lamang sa bugas apan sa tanang mga palaliton o basic commodities ilabi na nga nagkaduol na ang pasko.
Samtang gidayeg ni Kagawad Ian Mark Nacaya ang Department of Trade and Industry (DTI) lakip na City Price Monitoring and Coordinating Council sa pagpatuman niini.
“Mapasalamaton kaayo ang katawhan nga miubos na ang presyo sa bugas tungod sa kalipay sa katawhan we would like to congratulate DTI and price monitoring council of Cagayan de Oro for enforcing the law and for reducing the price of rice," pahayag ni Nacaya.
Gilauman nga mas mapa-ubsan pa ang presyo sa bugas aron mas malipay pa ang katawhan.
“And for the reason alone malipayon ug masadya ta, kung mapaubos pa gyud ang presyo sa bugas mas maayo gyud unta kay diha nakita nga naay manipulation lugar sa presyo ug dili angayang magsugod sa merkado,” dugang niini.