MOKABAT sa 10,000 ka mga trabahante ang gikinahanglan sa pagsugod sa katukoran sa Habini Bay diha sa lungsod sa Laguindingan, Misamis Oriental.
Gikumpirmar ni Misamis Oriental Provincial Administrator abogado Joy Matteo-Lood nga moabot ngadto sa 10, 000 ka mga trabahante ang gikinahanglan sa Ayala Corporation sa katukoran niini.
Dako og impact ang katukoran niini gumikan kay ma-empleyo ang taga Misamis Oriental nga nagkinahanglan sa trabaho ilabina nga giabiso ni Misamis Oriental Governor Yevgeny Vincente Emano nga iprayoridad sa pangempleyo ang taga Misamis Oriental.
“Karon naay 10,000 job opening aning Habini Bay ug advice ni Governor Emano nga priority ang taga Misamis Oriental,” matud niini.
Mosobra sab ang trabahante niini hinungdan nga matabangan pa niini ang kasikbit nga mga lalawigan sa Northern Mindanao nga makapanarbaho dinhi sa probinsya.
Daghan pang job opportunities ang mobukas sa taga Misamis Oriental dinha sa PHIVIDEC Industrial Authority kon diin daghang planta pa ang matukod.
“Kanang 10,000 ka trabahante dili nato makaya pagprovide, daghan pa kita og job opportunities ma-open sa PHIVIDEC,” matud ni Matteo.
Aron mahatagan og igong kahanas ang Misamisnon hinungdan sunod sunod ang skills training nga gipahigayon kay kini mao ang gikinahanglan karon.
“Ang gusto ni Governor Bambi is to equip the Misamisnon with the necessary skills kay mao kini gikanahanglan karon kay of course kinhanglan nga manarbaho ta naa gyod tay skills,” pasabot ni Matteo ug miingon nga giawhag niya ang tanang taga Misamis Oriental nga magtungha ug dili palabyon ang oportunidad aron makapangempleyo.
Panglantaw
Dili masabot iyang gibati dihang nakita ang plano niini nga katukoran sa 524 ektaryang luna nga gipanag-iyahan sa Ayala Land.
“It’s another city within the municipality, kabalo man ta sa Ayala. Nanglimbawot akong balhibo,” matud ni Matteo ug miingon nga paingon na sa dalan sa kalamboan ang probinsya ug dili ug wala nay bisan kinsa pa ang makapugong pa niini.
“There is no turning back, padulong siya didto. We’re just so happy kay si Governor Emano naay vision. Kabalo siya nga ingon ani ang gusto niya mahitabo nga kita tanan kuyog niini nga kalamboan ug walay mahibilin," pahayag ni Matteo sa interbyu sa Sun.Star SuperBalita.