IRO ug dili wakwak ang milapa sa 17 ka mga manok niadtong Nobiyembre 12, 2018 sa Barangay Indahag ning siyudad sa Cagayan de Oro nga gika-alarma sa mga residente.
Walo niini ang namatay ug naputol putol ang mga lawas samtang siyam ang samdan.
Sa pakighinabi sa Sun.Star Superbalita kang Jai Rosas, anak mismo sa tag-iya sa maong mga manok, nga una nagtuo sila nga sigbin ang mihimo niini human usab sa nakita sa sitwasiyon sa ilang mga binuhing mga manok diin samaran sa liog ug sa sampot, gani ang pipila niini katunga nalamang ang nahabilin.
Una kining nagduda gumikan kay nakasinati usab sila og katingal-an nga panghitabo sama na lamang sa dihang grabe ang pagsaba saba sa ilang iro nga si Yatchie ug adunay nakit-ang duha ka mga dagkong iro apan kalit nga nahanaw.
Apan nawala ang kabalaka ug kahadlok sa dihang gikumpirma nga iro ang naghimo niini human nga gi-angkon usab sa tag-iya nga susama niini ang binuhatan sa maong hayop.
“Mga iro jud to na notorious na ing-ato ang binuhatan. Nabal-an man owner sa iro. Aminado sad ang tag iya na iyaha gyud to. Instead na mag pabayad or what sa nahitabo, gipasagdan nalang para way samok,” pahayag ni Rosas.
Nag-viral sa social media human usab nga gi-post niini ang maong panghitabo ug mi-ani og nagkadaiyang reaksiyon kinsa pipila nagtuo nga dili susama kanato ang naghimo.
Nanghinaot na lamang kini nga dili na mausab ang susamang panghitabo ug unta mamahimong responsable sa mga binuhing hayop ang mga tag-iya gumikan kay nakahatag kini og kabalaka ug purhisyo sa mga tag-iya sa mabiktima niining laing mga binuhing mananap.