NANUMPA ang bag-ong Sangguniang Kabataan (SK) chairman sa Barangay Indahag, human niabot na ang desisyon sa Commission on Election (Comelec) nga diskwalipikado ang midaug nga SK niadtong milabay nga eleksyon.
Nasayran nga over-aged si Agustine Racaza Laron, 24, kinsa nakakuha og boto nga 636, samtang ang nagsunod niini na si Lowen Estrada Pantaleon nakakuha og boto nga 389, ang nihulip niini.
Matud ni abogado Ramil Acol, City Comelec officer sa dakbayan, nga base na usab kini sa desisyon sa Comelec.
Giingong nakanselar ang Certificate of Candidacy (COC) ni Laron hinungdan nga gikonsiderar nga stray votes ang mga nakuha niini nga boto.
“Na-cancelled ang iyang certificate of candidacy, mura ra gihapon og wala siya nikandidato unya ang iyang mga boto na considered as stray votes,” pahayag ni Acol.
Giingong ang barangay canvasser nag-reconvene aron nga maproklamar si Pantaleon kinsa mao ang nagsunod niini.
“Gi-correct nila ang certificate of proclamation para ma-proclaim kibale to si Pantaleon, stray naman to kang Laron kinsa tong highest votes excluding si Laron mao toy e-declare as bag-ong SK,” dugang niini.
Matud ni Acol, nga mao pa lamang kini ang nigawas nga desisyon diin kahinumdoman nga anaa pa sa mga 20 kapin ang gikatahong mga midaug nga diskwalipikado lakip ang mga SK member. (KCS)