USA ka patayng lawas sa babaye ang napalgan sa baybayon nga bahin sa Barangay Hubangon, lungsod sa Mahinog, Camiguin.
Si Police Officer 1 Roldan Perez sa Mahinog Police Station miila sa biktima nga mao si Flaviana Bag-ho, 47, lumad nga taga Dinagat Island ug giingong dunay deperensya sa pangisip.
Matud ni Perez nga niadtong Nobiyembre 12, pasado alas 6:40 sa buntag, mitaho sa ilang buhatan si Joefel Abucayon, ang Municipal Risk Reduction Management Office kalabot sa patay’ng lawas.
Ang biktima anaa na sa pagkadugta, dihang napalgan ug nagsul-ob og leggings ug t-shirt.
Gibana-banang anaa sa 40 ngadto 45 anyos ang pangidaron.
Pasado alas 11:00 sa buntag sa susamang adlaw human sab nila gi-post sa ilang Facebook page ang patay’ng lawas alang sa identipikasyon niini, nakatawag ang Philippine Coast guard sa Dinagat Island, human haom kini sa ilang gipangita nga si Bag-ho.
Matud ni Perez nga ang pamilya maoy niila niini, ug ilang gisaysay nga niadtong Nobiyembre 8 nitukar ang sakit niini, ug kalit midagan sa dagat ug misalom.
Tungod sa kadako sa balod wala na kini nila makit-i, taliwala sa paningkamot sa mga kabanay ug mga rescuers nga makit-an kini.
Apan tungod sa kalayo sa gipadparan niini ug kalisod sa ilang kahimtang sa dapit, ilang gihangyo nga ipalubong na lamang kini sa Camiguin.
Ang kagamhanan sa probinsya sa Camiguin maoy nagpahiluna sa patayng lawas, pagbalsamar, pagbutang niini sa lungon, ug gilubong kini pagka alas 4:00 sa hapon human miabiso ang Health officer sa dapit nga dili na kini kinahanglan padugayon pa. (SVB)