GIIMBITIHAN sa kapolisan ang mga sakop sa media sa pag-uban sa mga drug operation, human sa padayon nga pangutana kalabot sa mga operasyon sa Misamis Oriental nga adunay makabsan sa kinabuhi.
Gipanawagan ni Misamis Oriental Provincial Police Office (MOPPO) director, Police Senior Superintendent Rolando Destura ang mga sakop sa media nga mosaksi sa mga drug operation nga gipahigayon sa kapolisan.
“We encourage media to join us in our operation,” matud ni Destura.
Ning tuig 2018 lamang moabot ngadto sa 21 ka mga drug suspect ang napatay sa Misamis Oriental gikan sa nagkalain-laing police station.
Apan giklaro ni Destura nga mas daghan niini ang nasikop kay wala nagpakita sa pagsukol atol sa mga operasyon.
Gikatakda sab silang magbutang og body camera, nga moabot karong 2018 sumala sa gipasalig sa kagamhanan sa probinsya. (SVB)