UNANG higayon sa kasaysayan sa Mindanao International Container Port (MICT) sa lungsod sa Tagoloan, Misamis Oriental nga adunay tone-toneladang basura ang niabot gikan sa nasud sa South Korea.
Gibutyag ni John Simon, Port Collector sa MICT, nga plastic synthetic flakes ang nakabutang sa dokumento, apan ilang nasusihan nga mga basura sama sa mga papel ug kahoy ang nadiskubre sulod sa kargamento.
Ang synthetic flakes himuon unta og plastic pellets nga alternatibo sa fuel.
Nahidangat dinhi sa Pilipinas ang maong kargamento niadtong Hulyo 2, 2018
Pagsusi niini dili mao ang deklarasyon sa consignee nga mao ang Verde Soko Philippine Industrial Corporation.
“For the first time in history in the country ang nakapasok sa atin ay isang barko ng basura,” matud ni Simon.
Samtang ang senior supervisor sa maong korporasyon wala na mihatag og ekplanasyon nganong nahitabo kini ug nahidangat kini sa nasod nga misdeclared.
Gani aduna pay mo-abotay nga mga kargamento gikan gihapon sa South Korea sa umaabot nga tuig 2019.
Nadiskubre sab sa MICT nga aduna pay 51 ka mga container van nga gipanag-iyahan sa maong kompanya ang niabot niadtong Oktubre sa maong port nga gi-hold, kay adunay mga kakulangan sa dokumento sama sa wala makakuha og entry of declaration, ug environmental permit gikan sa buhatan sa Department of Environment and Natural Resources.
Gihulat kini sa MICT nga makasumite niini.