COTABATO CITY -- Sundalo ug pulis nadakpan atol sa anti-drug operation alas 4 sa hapon niadtong Miyerkules, Nobyembre 14.
Giila ang mga suspek nga sila Sergeant Nelson Cali, sakop sa Philippine Army samtang ang pulis mao si PO3 Francis Cando.
Matud ni Cotabato City Police Office director, Senior Superintendent Rolly Octavio nagpahigayon sila og drug bust, uban ang Philippine Drug Enforcement Agency (PDEA)-Armm sa Rufo Maniara Street, Barangay Rosary Heights 11 sa nahisgutang dakbayan.
Sa diha nga gitunol na sa mga suspek ang shabu sa asset sa mga pulis ug PDEA, didto na sila gidakop.
Nakuha sa posisyon nila Cali ug Cando ang lima ka pakite sa shabu og mga drug paraphernalia.
Gikompirma sab ni Senior Superintendent Octavio nga dugay na nga nag-Awol (absence without leave) ang mga suspek diin nalambigit sila sa illegal drug trade sa Cotabato City ug Maguindanao.
Giangkon sab sa duruha nga sila nagpayuhot og gidiling druga human nag-Awol sa ilang trabaho.
Gisang-at na batok sa mga suspek ang kaso nga kalapasan sa Republic Act 9165 o Comprehensive Dangerous Drug Act of 2002. (Edgar E. Fuerzas)