Kaso batok drayber sa bus gipasaka na

DIGOS CITY -- Pormal nang giduso sa kapulisan ang kaso batok sa drayber sa Mindanao Star Bus nga nakaligis patay sa unom ka mga tawo diin tulo kanila mga bata, alas 6:20 sa buntag niadtong Miyerkules, Nobyembre 14.

Sumala ni Superintendent Deozar Almasa, hepe sa Digos City Police Office (DCPO), nailhan na ang tinuod nga ngalan sa biktimang si alyas Pedo nga mao si Joel Ocdenaria Castro III, dos-anyos nga anak sa drayber nga si Joel Jr.

Patay sab ang asawa niining si Honey Grace, 27, ug laing mga anak nga sila si Cyri, 7, Joana Clair, 4, ug ugangang si Floro, 50.

Si Almasa nagbutyag nga ang drayber sa bus nga si Fermin Gumpa Macalos, 45, molupyo sa Makilala, North Cotabato, ang gipasakaan og kasong reckless imprudence resulting in multiple homicide and damage of property sa City Prosecutor’s Office.

Kahinumdomang nahitabo ang ngilngig nga insidente sa junction road sa Barangay Cogon, human nahurot og kamatay ang mga pasahero sa traysikel nga pulos magka-pamilya dihang gidaro sa bus.

Pauli na ang pamilya sa lungsod sa Sta. Cruz gikan sa dakbayan dihang nahitabo ang disgrasya.

Samtang si Almasa, nagpahinumdom sa tanang drayber sa motor, bisikleta ug traysikel nga dili magpatunga sa national highway ilabi na nga ang outer lane mao ang ilang agianan.

Adunay direktiba ang Department of Interior and Local Government nga did-an ang mga traysikel nga modagan sa national highway apan daghan gihapon ang wa motuman niini. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph