ANG base fare rate sa electronic jeepney (e-jeepney) nga mobiyahe sa kadalanan sa dakbayan sa Lapu-Lapu P6.50 alang sa unang lima ka kilometro ug dugang 90 sentabos sa succeeding kilometer.
Kini maoy gipahibawo ni assistant director sa Land Transportation Franchising and Regulatory Board ( LTFRB) 7 Reynaldo Elnar atol sa gipahigayon nga test drive kagahapon, Nobiyembre 15.
Samtang 26 kilowatts sa kuryente ang konsumo sa fully charge ang battery sa e-jeepney nga gibana-bana nga mokabat ngadto sa P276 sa electric bill, base sa gihimong pagtuon Star 8 Green nakabase sa Las Piñas, Manila nga maoy supplier sa maong solar-powered vehicle.
Si Leonardo Porton, technician sa Star 8 nagkanayon nga moabot sa 120 ngadto na sa 150 kms gilay-on nga mabiyahe sa usa ka fully charge battery sa e-jeepney nga adunay maximum speed nga 70 kph.
Gipasabot ni Porton nga moabot sa 22 ngadto sa 23 ka mga pasahero nga makalingkod samtang wa itugot sa LTFRB nga adunay standing.
Ang matag unit sa maong sakyanan adunay brushless electric fan, charging port alang sa gadgets, Wi-Fi, GPS, advertising board, LED TV alang sa ads, ug automated per collection system (APCS).
Matod pa sa technician nga ang solar panel nga anaa nahimutang sa ibabaw sa atop sa sakyanan maoy mohatag og power ngadto sa features diha sud sa e-jeepney ug bugtong gamit lang sa battery maoy ang pagpadagan sa sakyanan.
Sa higayon nga fully operational na ang e-jeepney mogamit na ang mga pasahero og tap card nga basahon sa APCS nga maoy kuhaan sa ilang plite.
Si LTFRB Assistant Director Reynaldo Elnar nagkanayon nga gawas sa rota diin mosubay sa circumferential highway ang e-jeepney adunay laing rota nga manukad sa Poblacion, Lapu–Lapu City, subay sa Barangay Basak, Marigondon, lahos sa Gabi bridge sa lungsod sa Cordova dayon molibot sa maong lungsod.
Ang circumferential highway nagsubay sa M.L. Quezon Highway gikan sa Barangay Poblacion, Pajo, Pusok, Ibo, Buaya, Mactan, Maribago, Marigondon, Basak ug balik sa Poblacion vice versa.
Dugang pa ni Elnar nga gitinguha sa nasudnong kagamhanan nga sa tuig 2020 hingpit nang wagtangon ang multicabs ug traysikol nga mogamit sa highways sa tinguha nga mapatuman ang transportation modernization program sa Department of Transportation (DOTr). FVQ