SECTIONS
Monday, December 17, 2018
SUPERBALITA CEBU

Mananga bridge gibuksan pagbalik

Gibuksan. Kay way klarong traffic plan, ang gisirhan nga bahin sa Mananga Bridge gibuksan pagbalik sa mga sakyanan. (Arni Aclao)

TUNGOD kay way naandam nga traffic management plan, paagian og balik alang sa gaan nga mga sakyanan ang lane sa Mananga Bridge nga paingon sa siyudad sa Sugbo.

Kini ang nasabotan atol sa panagtagbo sa mga opisyal sa Department of Public Works and Highways (DPWH); Zion Construction, ang contractor nga maoy moayo sa northbound lane sa taytayan; City of Talisay-Traffic Operation Development Authority (CT-TODA); kagamhanan sa dakbayan sa Talisay, Kapitolyo ug mga kapitan sa mga barangay Lawaan 3 ug Tabunoc sa Huwebes, Nobiyembre 15, sa Talisay City Hall.

Si Jonathan Tumulak, focal person sa traffic management sa Kapitolyo, nibutyag nga sa tigom nahukman sa DPWH, Zion Construction ug Talisay City Hall nga temporaryo una nga ihunong ang pag-ayo sa taytayan sud sa 10 ngadto sa 15 ka adlaw aron himuon ang traffic management plan.

“Prior sa implementation sa repair, mag-una gyud unta na ang traffic management plan before sila mo-close sa taytayan,” padayag ni Tumulak, usa sa mga nitambong sa tigom.

Mtod niya, ablihan og balik ang Mananga Bridge kon makamontar na og DPWH ug contractor og signages ug traffic cones nga maggiya sa mga motorista nga moagi sa dapit.

Kadto lang mga sakyanan nga gaan ug may upat ka ligid ang mahimo moagi sa taytayan sa higayon mabuksan og balik ngadto sa mga motorista ang northbound lane. Kini sama sa awto, public utility jeepney ug multicab.

Samtang, ang dagkong mga sakyanan sama sa mga trak ug buses kay adto paagion sa Cebu South Coastal Road (CSCR) o mangita sila og laing dan nga kaagian aron malikay sa Mananga Bridge.

Si Talisay City Mayor Eduardo Gullas unang nabalaka nga makamugna og kahuot sa dagan sa trapiko ang pagsira sa northbound lane sa taytayan labi na naghinangat ang kasaulogan sa Pasko.

Gihangyo sa siyudad ang DPWH nga mosumitir og TMP aron matun-an ug kinahanglan pa kini nga aprobahan sa konseho sa maong dakyanan sa dili pa ipatuman.

Si Engr. Jun de la Cruz, pangu sa Maintenance Division sa DPWH 7 ug usa sa nitambong sa tigom, nakasabot sa habig sa dakbayan sa Talisay.

Ayuhon ang Mananga Bridge kay nagsugod na og kahuyhoy ang usa ka bahin niini ug delikado kon dili maatiman.

Matod ni Engr. Joselito Sayson, pangu sa Construction Division sa DPWH 7, kinahanglan usab sila magtaud og spans or beams sa tulay.

Sa miaging tuig pa unta ipatuman ang proyekto nga nagkantidad og P44.3 milyones, apan tungod sa pipila ka mga rason, sama sa presensya sa mga informal settler ubos sa taytayan, nalangay ang pagpatuman niini.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!