GITAKDANG magtigi ang 16 ka mga eskwelahan ug magpakita sa ilang mga talento ilabi na sa drum and lyre competition, adlaw’ng Dominggo, Nobyembre 18.
Ang mga tunghaan nagagikan sa Bukidnon, Misamis Oriental, Lanao del Norte, ug dakbayan sa Cagayan de Oro, ug kini gipasiugda sa Rotary Club of South Cagayan de Oro sa Misamis Oriental Integrated Sports Complex (“MOISC”) o Pelaez Sports Complex.
Dunay duha ka kategorya diin walo sa elementarya ug walo usab sa sekondarya.
Matud ni Antonio Resma Jr.,sa RC of South Cagayan de Oro nga daghan ang partisipante diin gilauman nga mga anaa sa mga 5000 ang motambong atol sa kompetisiyon.
“Yes, daghan participants from all over the Region, Bukidnon, Misamis Oriental, Lanao del Norte, and Cagayan de Oro ang mag join, we are expecting around 5000 guest to watch,” pahayag ni Resma.
Ang mananaog makadawat og kantidad nga P50 mil, P30 mil ug P20 mil alang sa Champion, 1st runner up, ug 2nd runner up alang sa High school category samtang P40 mil, P20 mil, ug P10 mil alang sa elementarya nga categorya.
Ang Drum and Lyre Competition mao ang flagship project sa Rotary Club of South Cagayan de Oro. Sulod 30 ka katuigan ang RC South CdeO nagpasiugda niini matag tuig aron sa paghatag sa mga kabatan-onan og kahigayonan para mapakita ang talento sa musika. (KCS)