SUPERBALITA CEBU

SSS makaabag sa taktakon sa trabaho

MAKADAWAT og benepisyo gikan sa Social Security System (SSS) nga tunga sa buwan nga sweldo sud sa duha ka buwan ang usa ka empleyado nga inboluntaryo nga mawad-an og trabaho.

Kini kon pirmahan ug way ipausab si Presidente Rodrigo Duterte sa balaudnon nga mag-amend sa 21 ka tuig nga charter sa SSS.

Sa miaging buwan, giaprobahan sa bicameral conference committee ang Senate Bill No. 1753 ug House Bill 2158 kun Social Security Act of 2018 nga usa sa mga probisyon kon mahimong balaod, maghatag og gahom sa SSS sa pag-review ug pag-revise sa contribution rate sa mga miyembro.

Sa kasamtangan, 11 porsyento ang gitakda nga contribution rate sa usa ka miyembro. Kini nagpasabot nga 11 porsyento ang kuhaon isip kontribusyon gikan sa gideklarar nga binuwang sweldo sa miyembro.

Gibutyag ni Atty. Emmanuel Dooc, presidente ug chief executive officer sa SSS, usa sa nindot nga features sa gisugyot nga balaudnon ang paghatag og unemployment benefit ngadto sa trabahante nga miyembro nga matangtang sa trabaho.

Siya nipasabot ang kwalipikado nga empleyado nga mawagtangan og trabaho makadawat og 50 porsyento sa iyang average nga binuwang sweldo hangtod sa duha ka buwan.

Pananglitan, P10,000 ang suhulan sa maong kawani sa matag buwan, kinatibuk-ang, P10,000 ang iyang madawat nga benepisyo alang sa duha ka buwan.

“Inaasahan namin na sa dalawang buwan na ‘yan dapat magsumikap ka nang maghanap ng kapalit na trabaho. Baka naman kung mamihasa kayo paduyanduyan na lang kayo diyan, patulogtulog, may tatanggapin kayong unemployment benefit,” pahayag ni Dooc atol sa press conference sa Biyernes, Nobiyembre 16 sa main branch sa SSS, siyudad sa Sugbo.

Ang paghatag sa unemployment benefit ang usa ka mandato nga gitakda sa International Social Security Association nga gipatuman na sa ubang progresibong mga nasod.

Kabahin kini sa walo ka comprehensive social security benefits nga death, sickness, funeral, disability, maternity, ug pension. Ang ikawalo mao ang children’s and family allowance nga maglisod pa sila og hatag.

Kon mapirmahan ni Duterte ang balaudnon, mag-isyu sila og implementing rules and regulations sa pagpatuman niini.

Sa balaudnon, hatagan og gahom ang SSS nga makapaumento sa contribution rate sa mga miyembro hangtod sa 12 porsyento sa 20196 ug mapasakaan pa kini sa mosunod sa mosunod sa matag laktaw sa usa ka tuig hangtod moabot og 15 porsyento.

Laing probisyon sa balaudnon, kinahanglan nga tanang gibanabanang 5 milyones ngadto sa 10 milyones ka overseas Filipino Worker nga tua sa ubang mga nasod ang ipamiyembro sa SSS.

Gitug-an ni Dooc nga sa kasamtangan, 560,000 pa lang ka mga OFW ang namiyembro sa SSS.

Siya nidugang nga kon mamiyembro silang tanan, motaas ang kontribusyon ug makatigom og dako ang ahensiya nga makatabang nga masustentohan ang tanang mga programa sa SSS.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph