DUL-AN sa P2 milyones nga balor sa gidudahan nga shabu ang nasakmit sa kapulisan ug tulo ka mga babaye ang nasikop atol sa joint operation sa Canduman Police Station ug sa City Intelligence Branch sa Mandaue City Police office alas 2 sa Biyernes sa hapon, Nobiyembre 16 sa Barangay Paknaan.
Ang nasikop ug target sa operation giila nga si Jayne Alejandria, 28, taga Zone 7 Riverside, Barangay Canduman, dakbayan sa Mandaue.
Nakuha kaniya ang duha ka dagkong mga bulto sa gidudahang shabu.
Laing nasikop mao sila si Eloise Jori Alcantara, 20, taga Arellano Boulevard, Barangay San Roque, Dakbayan sa Sugbo ug si Marife Estay, 45, taga Curba, Barangay Libertad, syudad sa Bogo.
Ang duha naa sa sud sa giabangang balay ni Alejandria.
Nakuha sa kapulisan ang duha ka mga dagkung bulto sa gituohang shabu ug lima ka mga pinakete sa shabu gikan sa tulo.
Gibana-bana nga aduna kini gibug-aton nga 165 gramos ug adunay Dangerous Drugs Board (DDB) value nga P1.9 milyones.
Matod ni PO2 Ryan Diamada sa Canduman Police Station, nga newly identified drug player si Alejandria.
Nakadawat lang sila og report kalabot sa pagpamaligya niini og ginadiling drugas sa balay nga giabangan sa Pagsabungan.
Human nagpositibo sa pipila ka semana nga surveillance, gihimo kagahapon sa hapon ang buy bust operation.
Wa sila magdahum nga ingon ato kadaghan sa shabu ang anaa sa posisyon sa mga dinakpan. FMD