2 ka ‘tulisan, karnaper’ nadakpan

DUHA ka giingong tulisan ug kawatan og motorsiklo ang nadakpan sa Guadalupe police niadtong Miyerkules, Nobiyembre 14, atol sa check point human sila giingong manulis sa usa ka empleyado sa banko.

Sila nakuhaan og illegal nga drugas nga mobalor og P46,000 lakip na ang motor nga ilang gisakyan nga ila usab nga kinawat.

Ang nadakpan giila sa kapulisan nga sila si Lonie Viene Ledesma, 34, taga Barangay Suba, syudad sa Sugbo ug John Kenneth Pungcol, 18, taga Barangay Sawang Calero.

Gikan ang duha nga nanulis sa usa ka empleyado sa banko sa Guadalupe.

Apan sa pagsibat nila agi sa Tipoloville sa Barangay Kalunasan, naatol usab nga nag-check point ang mga pulis.

Matod ni Sr. Inspector Dexter Basirgo nga padung na unta mobalik ang mga tulisan, apan nababagan na sila sa mga pulis.

“Coincidence nga nag check point didto sa Tipoloville unya didto pud na sila moagi dapit. We are about to stop, mo-stop na sa checkpoint, naagi na sila mao tong atong na flagdown,” asoy ni Basirgo.

Positibo nga gitudlo sa empleyado sa banko silang Ledesma ug Pungcol nga maoy mitulis kaniya.

Sa dihang girekisa ang duha, nakuha gikan kanila ang 10 ka pakete sa gituohang shabu, cellphone sa biktima, .38 nga kalibre sa armas lakip na ang motor nga Suzuki Smash.

Dugang ni Basirgo nga nadakpan na kaniadto sa Pardo police station si Pungcol sa kasong pagpangawat og cellphone apan nakapyansa.

Sa pakisusi nasuta nga ang tag-iya sa motorsiklo nga ilang gisakyan iya sa usa ka BJMP personnel nga nakawatan usab sa iyang motorsiklo.

Dako ang posibilidad, matod ni Sr. Inspector Arieza Otida, nga daghan pang mga pagpangawat og motor ang gihimo sa duha nga masulbad human sila masikop.

Wanted

Samtang number 1 most wanted sa Pardo police station nasikop usab nila pinaagi sa warrant of arrest nga giluwatan ni Judge Ruben Altubar sa Branch 29 sa syudad sa Sugbo.

Ang nadakpan mao si Erwin Badayos nga taga Villa Bulsita, Barangay Bulacao, ug adunay kaso nga carnapping.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph