USA pa gani ka semana sukad ang Cebu City Government nagsugod sa iyang programa nga magabiing libreng sakay sa bus alang sa business process outsourcing (BPO) workers, nakontrobersiya na kini.
Niadtong Nobiyembre 15, si Mayor Tomas Osmeña ni-post sa iyang official Facebook page og screen-captured nga hulagway sa usa ka post nga nagsaway sa free bus ride program.
Ang post nagkanayon nga di tahas sa City Government sa paghatag og libreng sakay alang sa mga kawani sa pribadong kompaniya samtang napasagdan ang kabos nga mga tinun-an, senior citizens ug dunay mga apan sa lawas sa biyahe dinhi sa siyudad.
Si Osmeña, sa iyang tubag, nilambigit sa ngan ni Presidential Assistant for the Visayas Michael Dino ug nga ang mao nga mga bus bukas alang sa ubang mga pasahero nga naa sa karsada ug mao nga rota sa lawom nang gabii.
“Contrary to what Michael Dino is paying you to say, the midnight-early morning shuttle is open to all people who need transportation when no jeepneys are available. Nurses and night students need a safe way to get around too, “ matod ni Osmeña.
Sayo pa, si City Call Center Program head Nanette Garong niingon nga bisan kon ang 25-seater buses mopasakay sab sa laing mga pasahero, gi-prioritize ang BPO workers.
Siya nipasabot nga ang mao nga transportation system tubag sa Siyudad sa giisa sa mga opisyal sa BPO human patya ang usa ka call center agent nga nisukol sa mga tulisan sa Barangay Mabolo.
Apan nganong ang Siyudad wa mangayo og plete sa mga trabahante sa BPO?
Sa interbyu niadtong Huwebes, Nobiyembre 15, si Osmeña niangkon nga ang di maayong relasyon nila ni Dino maoy rason nganong ang Siyudad wa mangolekta og plete.
“Because if you are going to charge, we have to get a franchise and we expect the LTFRB (Land Transportation Franchising and Regulatory Board) to give us the hardest time. I’ll be very frank: these people are all Dino people, so the only way to go around is libre sa. You want to make it work, then later on we will find it out,” siya nagkanayon.
Apan si LTFRB 7 Director Eduardo Montealto Jr. nanghimakak nga lisudlisuron ang Siyudad sa paghimo niini.
Proseso
Sa interbyu sa Superbalita Cebu, si Montealto niingon nga mahimong mo-apply ang Cebu City og prangkisa, apan kinahanglang moduso sila og Local Public Transport Route Plan (LPTRP) ngadto sa iyang buhatan kay di sila makasayon sayon sa pag-isyu.
Kini tungod sa moratorium sa pag-isyu alang sa mga public utility vehicle (PUV).
Sa di pa usab kini buhaton sa Siyudad, kinahanglang mananghid una sila sa Commission on Audit (COA),
Kon motugot ang COA, una pa makaduso og LPTRP.
Human makaduso ang Siyudad niini, susihon sa LTFRB kon nakatuman ba kini sa mga rekisitos, usa niini terminal alang sa mga PUV.
Kon ilang masuta nga natuman na sa Siyudad ang tanang rekisitos, diha pa sila moisyu og notice of compliance ngadto sa Siyudad.
Human niini, ang Cebu City Council kinahanglang mopasar og ordinansa, diin malatid ang gidaghanon sa gikinahanglang PUV sa rota nga gitumbok alang sa paghatag na og mga prangkisa.
Maglakip na unya sa mao nga mga sakyanan ang mga bus sa Siyudad nga nagdagan karon alang sa mga trabahante sa BPO.
Ang unang deadline sa pagduso og LPTRP karong Enero 2019 ug ang lain sa Marso.
Si Montealto niingon nga di angay nga himuong rason ni Osmeña ang ngan sa usa ka tawo sa wa paghimog lakang sa Siyudad aron pagkuha og prangkisa.
Matod niya nga kay maayo ang programa ni Osmeña, ila kining suportahan.
Upat nagbiyahe
Sa pagkakaron, gipabiyahe sa City Government ang ilang upat ka bus.
Kini ang gipadayag ni Ronald Malacora, pangulo sa Department of General Services.
Ang duha ka bus manukad gikan sa JY Square, subay sa Gorordo Avenue, Fuente Osmeña paingon sa Colon.
Ang usa manukad sa IT Park paingon sa Mabolo, dayon sa Plaza Independencia lahos sa Colon ug vice versa.
Adunay usa nga gikan sa Mabolo (Andoks) paingon sa IT Park ug vice versa.