DAVAO DEL NORTE -- Imbestigahan sa Kongreso ang mikatap karon nga peke nga bugas sa Dakbayan sa Davao.
Kini maoy pasalig ni Congressman Mark Villar, nangulo sa komitiba sa Trade and Industry sa Kongreso, sa dihang nahinabi sa SuperBalita alas tres sa hapon niadtong Miyerkules didto sa Palengke sa Dakbayan sa Tagum.
Ang kongresista sa Las Peñas misuroy sa probinsiya aron mosaksi sa 78th Kadagayaan Festival ug ang pagsubay sa mga benepisyaryo sa Small Business Corporation sa Department of Trade and Industry.
"We will investigate the matter, to the soonest. Una pa lang naman natin narinig yan dito sa Davao pero nararapat na pagtuonan ito ng pansin lalo pa sa komitiba natin," tubag sa kongresista.
Usa sa mga benepisyaryo sa DTI, mao ang Baga Rice Mill, usa sa mga karaang rice mill sa Dakbayan sa Tagum.
"Ok naman po kami. Maraming salamat sa opportunity sa gobyerno nga gihatag sa amua. Pero dako gayud nga problema ang imported nga bugas isip kompetensiya sa presyo ug ka delikado sa atong industriya anang giingong peke nga bugas karon," sulti ni Beatriz Baga, tag-iya sa maong rice mill.
Ubos sa programang ayuda alang sa mga gagmay nga negosyante ug kooperatiba, usa si Baga sa tulo ka mga negusyante nga malampuson sa ilang mga negusyo pinaagi sa ayuda sa DTI.
Sulti ni Baga, wala pa nuon gidungog ang pagsulod sa peke nga bugas dinhi sa probinsiya pero angay kini nga kabalak-an ug mismo siya ang mibutyag niini ngadto kang Villar kuyog si Davao del Norte District I Congressman Anthony del Rosario ug Mayor Allan L. Rellon.
Sila si del Rosario ug Villar nanawagan sa publiko nga mag-amping ug mipasalig nga molatid og mga pamaagi aron mapakgang ang pagsulpot sa giingong peke kun synthetic nga bugas sa mga merkado.
Gi-awhag usab ni Villar ang mga negusyante nga maningkamot ug mokonsulta sa DTI kon nagkinahanglan og tabang sa pagpalambo sa ilang mga patigayon.
"Malaking bagay ito kasi hindi naman kailangang magsimula sa malaki. Kahit ang tatay ko noon, nagsimula lamang sa P10,000," dugang sa kongresista.
Matod pa nga gituyo sa kongresista nga bisitahon ang mga benepisyaryo sa DTI aron pagsubay sa kalampusan sa maong programa.