MOKABAT sa 1,300 ka mga senior citizen (SC), nga sakop sa Senior Citizens’ Federation sa tibuok Misamis Oriental, ang bag-ohay lang nagpahigayon sa ilahang convention sa kapitolyo probinsya.
Kini nga mga SC ang nagikan sa 23 ka mga lungsod sa lalawigan nga gipangulohan sa dako nga si Benjamin Medina, kinsa pinakalabing unang national president sa Office of Senior Citizens Affairs league sa Pilipinas.
Gipaabot niini iyang kalipay ngadto sa kagamhanan sa probinsya sa pagpangulo ni Governor Yevgeny Vincente Emano tungod sa dakong gugma sa mga susama kanila nga mga senior citizen human malampuson ang programa.
Nagdala kini sa tema nga: “Ilhon ug Dunggon: Tigpanalipod sa Katungod sa Katigulangan Padulong sa Katilingbang Maatimanunun.”
Sa report gikan sa Misamis Oriental Social Welfare Development, ubos sa head nga si Emelia Andea, nga sa kinatibuk-an aduna nay 53,056 ka mga senior citizen ang rehistrado dinhi sa lalawigan, ug ang 424 ka mga barangay lakip sa supplemental feeding program diin 35,000 kanila nakabenipisyo niini.
Nahatagan sab og 82 ka mga wheelchairs ang mga senior citizens nga galisod na sa paglakaw. (SVB)