SA unang higayon karong tuiga, usa ka bagyo ang gikatakda nga moigo sa Sugbo karong semanaha, matod sa usa ka opisyal sa Philippine Atmospheric, Geophysical and Astronomical Services Administration (Pagasa) Visayas.
Karong Dominggo sa gabii, Nobiyembre 18, o sayo sa buntag ugma, Lunes, gikatakda nga mosulod na sa Philippine area of responsibility ang tropical depression nga pagatawgon og Samuel.
Ang bagyong Samuel maoy ika-19 nga bagyo sa nasod karong tuiga, labing una sa Nobiyembre, diin mao usab kini ang labing una nga bagyo karong tuiga nga direkta nga moigo sa Sugbo.
Matod ni Al Quiblat, officer-in-charge (OIC) sa Pagasa Visayas, nga sa Martes ug Miyerkules kini masinati sa Visayas.
Gikatakda usab nga mo-landfall kini sa Caraga Administrative Region ugma, Lunes, Nobiyembre 19.
Lunes usab gikatakda nga ipaubos ang Sugbo sa Signal Number 1.
Matod ni Quiblat nga nagdala ang maong bagyo og 40-60 kilometers per hour nga hangin diin posibleng magdala usab og 30 millimeters nga uwan.
Tungod kay pasaka kini, mo-landfall usab kini sa Bohol ug sa Sugbo.
Apan kon mohinay kini sa unang landfall, posible nga di moabot sa 120 kilometer per hour ang hangin nga mokuso-kuso niini sa Visayas.
Matod ni Quiblat nga Huwebes, Nobiyembre 22, gikatakda nga mogawas sa PAR, diin anaa na kini sa Palawan Area.