BISAN sa sunodsunod nga mga operasyon sa kapulisan sa Cebu City Police Office (CCPO) diin minilyon ka pesos na ang balor sa gidili nga drugas ang nasakmit, nganong wa man gihapon mohunong ang supply niini?
Kini ang pangutana nga gipalanog ni CCPO Director Royina Garma atubangan sa mga lider sa mga layko sa Artsidyosesis sa Sugbo sa Sabado, Nobiyembre 17 sa IC3, diin siya ang gikuha nga guest speaker kabahin sa social issues.
Sa binuwan nga caucus sa mga layko nga mga sakop sa Commission on the Laity ug Lay Organizations, Movements, Associations and Services (LOMAS), giangkon sa director nga wa pa sila ka one-fourth sa pagsumpo sa gidili nga drugas sa siyudad sa Sugbo, bisan kon sa uwahi nila nga operasyon P7.5 milyones na ang kantidad nga nasakmit sud lang sa 17 ka oras.
Matod niya, mag-usab sila sa ilang paglantaw sa problema sa gidili nga druga diin dili na sila motutok sa law enforcement nga problema.
Siya nibutyag nga tan-awon usab nila sa prospective sa patigayon ang pagsulbad sa maong problema.
Matod niya, atol sa ilang dialogue sa mga negosyante sa dakbayan sa Sugbo, siya nihangyo nga tudloan sila sa mga negosyante kon unsaon pagtumpag ang negosyo sa gidili nga drugas kay nasuhito ang mga magpapatigayon kon unsaon ang pagpatubo sa ilang negosyo.
“Hanggat di natin mapatay ang market, di gyud na mahuman,” padayag ni Garma.
Tinguha nila nga matagad ug dunay mosawo sa mga tiggamitan og gidili nga drugas aron paglikay nila sa dautang bisyo kay kon mokunhod ang ilang gidaghanon, mominos usab ang supply.
Siya nihangyo sa mga lay leader nga tabangan sila pagreporma sa mga tiggamitan og illegal drugs sanglit diha sa ilang kaugalingon magsugod ang kabag-ohan batok sa dautang bisyo.
“We have to support as a community. It is a one nation approach. Pagsinabi mo na one nation even basic members sa community, lahat tayo mayroong responsibility,” dugang ni Garma. SCG