Gipatay tungod sa gugma?

DUHA ang patay samtang usa ang naa sa talandugon nga kahimtang sa mga pagpamusil sa siyudad sa Sugbo kagahapon, Sabado sa kaadlawon, Nobiyembre 17.

Unang pagpamusil nahitabo ala una sa kaadlawon sa Joseville Subdivision, Barangay Bacayan, siyudad sa Sugbo.

Ang biktima mao ang usa nurse nga nagtrabaho sa usa ka medical company sa IT Park nga si Cristina Jayson, 25, nagpuyo ra usab sa maong dapit ug magsaulog usab unta sa iyang adlaw nga natawhan karong adlawa.

Dali nga niresponde ang Emergency Medical Services sa Dakbayan sa Sugbo, apan gideklarar nila kini nga wa nay kinabuhi kay wa nay vital sign sa ilang paghiling.

Si Jayson dunay samad pinusilan sa ulo.

Matod ni Sr. Inspector Alvin Llamedo, hepe sa Talamban Police Station, nga aduna na silay persons of interest sa pagpamusil.

Usa niini ang kanhi uyab ni Jayson nga iyang gibuwagan pipila ka mga buwan na ang nakalabay.

Nabasahan sa kapulisan ang text sa cellular phone ni Jayson sa pagpakigbuwag niya sa iyang kanhi kaipon.

Gipugngan sa kapulisan ang ngan sa mao nga tawo.

Tungod niini, ipatawag ni Llamedo ang kanhi hinigugma ni Jayson, lakip na ang kasamtangang hinigugma, aron makuhaan nilag pamahayag sanglit nagduda siya nga love triangle ang motibo sa pagpatay.

“Love triangle atong duda kay prior sa insidente, naay nakit-an nga tawo nga naghilak sa gawas sa ilang balay nga nagmotor. Basin mao to,” matod ni Llamedo.

Matod ni Llamedo nga duna na silay nakuhang mga impormasyon, apan di pa nila ikabutyag sa publiko.

Sud sa PUJ

Samtang namatay usab ang usa ka 39 anyos nga lalake nga taga sitio Mahayahay, Barangay Pasil nga giila nga si Marcial Rezaba human pusila sa wala pa mailhing lalake pasado alas 7 sa milabayng gabii sa dalan Macopa, eskina Siloy, Barangay Basak San Nicolas, siyudad sa Sugbo samtang Si Rebaza sakay sa PUJ.

Matod ni Chief Inspector Randy Caballes, hepe sa Mambaling Police Station, nga sa pagkakaron personal ang ilang gitan-aw nga motibo.

Wa pa silay matumbok nga suspek.

Gisiguro, matod pa, sa suspek nga mapatay ang biktima kay bisan daghan ang nanakay sa jeep, gidul-itan sa armas ang ulo.

“Wala pa gyud tay suspek kay sa mga kauban niya nga nag sakay sa jeep wala may nakakita sa nawong,” matod ni Caballes.

Kritikal

Naa pa usab sa talandugon nga kahimtang ang usa ka 38 anyos nga taga Bolinawan, siyudad sa Carcar, pasado alas 4 kagahapon sa kaadlawon samtang nag-inom uban sa iyang ig-agaw atbang sa Cebu South Bus Terminal.

Ang biktima giila nga si Ryan Alegado, kinsa samdan sa iyang walang aping, nga naa na karon sa usa ka publikong tambalanan. Ang Abellana Police Station nagpadayon pa sa pag ila sa suspek.