KITANG tanan pulos adunay destinasyon kung unsay gusto natong mahitabo sa kinabuhi samtang naglawig ang atong panahon dinhi sa kalibutan.
Niini, may mga butang nga gusto natong kab-uton, apan di nato maabot, ug ang wala mo tinguhaa, mao na hinuoy ihatag diha kanimo.
Sama kini sa politika karon, diin plastado na ang mga Duterte sa ilang mga posisyon sa umaabot nga mid-term elections.
Sa maong han-ay, Si Davao City Mayor Sara Duterte-Carpio magpasubli sa pagka-mayor; ang batan-ong manghod nga si Sebastian Baste Duterte sa pagka bise mayor; ug si Paolo Pulong Duterte sa pagka-kongresista sa unang distrito.
Kahinumdoman, duha ka higayon na nga miluwat og pamahayag si Pangulong Rodrigo Duterte nga ang iyang gusto nga mosunod pagka pangulo sa nasud mao si Mayor Sara.
Sa wa pa ang pag-file sa sertipiko de kandidatora, kusog kaayo ang pangalan ni Mayor Sara nga modagan sa pagka senador, diin sa survey anaa siya sa ika-upat o ika-lima, pero pag pag-abot sa ultima ora, subling nagpapili sa pagka mayor.
Karong Nobyembre 29, mao ang deadline sa pagkambiyo sa sertipiko de kandidatura diin kadtong midagan sa pagka bise mayor, pwedeng modagan na sa pagka mayor, ug kadtong mga kandidato nga sa pagtuo nila dili sila modaug sa pagka gobernador, pwedeng magkambiyo sa pagka bise.
Kung dawaton ni Mayor Sara ang gusto sa iyang amahan nga modagan sa pagka presidente karong umaabot nga presidential election sa 2022, unsay maayong posisyon nga daganan niya niining eleksiyona? Ang tubag niini, CONGRESSWOMAN sa unang distrito.
Kung may plano gyud si Mayor Sara nga dawaton ang hagit sa iyang amahan nga mag presidente, tama ang iyang hukom nga di mag senador kay bisan kung mahimong pa siyang Senate President, 23 lang ka senador ang iyang sakop ug walay kaugaligong distrito, pero kung mag-congressman siya segurado gyud nga mahimo siyang speaker, ug ang 296 ka miyembro sa Ubos Balay Balauranan, pulos adunay tagsa tagsa ka distrito, nga maoy mahimong preparasyon sa presidential elections.
Karong katapusang adlaw sa pagkambiyo sa sertipiko de kandidtura, pagka-congresswoman kaha ang daganan ni Mayor Sara? Ug si Paulo mao ba ka ha ang mag mayor?
Atngan nalang nato kining adlawa kung aduna bay kausaban diha sa ilang mga maayong destinasyon sa politika.