SUBAY sa pagtimaan sa World Prematurity Day niadtong Sabado, Nobiyembre 17, gianunsyo sa PhilHealth nga mahimo na nga ma-avail ubos sa Z Benefit Package alang sa mga premature nga puya nganhi sa Central Visayas.
Mahimo na nga maka-avail og Z Benefits ang mga mabdos nga duna’y risgo manganak og sayo ug ang premature nga mga puya sa Governor Celestino Gallares Memorial Hospital (GCGMH) sa Tagbilaran City, Bohol.
Ang GCGMH nga classified Level 3 government hospital sa Department of Health (Health), ang labing una ug sa pagkakaron, nag-inusara nga ospital sa tibuok nasod nga nakigkontrata sa PhilHealth aron mohatag sa mga serbisyo ilawom sa Z Benefits for Premature and Small Newborns.
Makagamit sa health insurance coverage sa PhilHealth alang sa pagpugong sa preterm nga pagpanganak ang mga inahan nga duna’y risgo makaanak og sayo sulod sa 24 ka semana ngadto sa wala pay 37 ka semana sa pagmabdos.
Ang kantidad sa insurance coverage anaa sa P600 ngadto sa P4,000.
Mahimo ‘sab nga makagamit sa health insurance coverage alang sa esensyal o gikinahanglan nga pag-atiman sa mga premature ug labihan ka gamay nga mga puya, kadto’ng dunay fetal age nga 24 ka semana ngadto sa wala pa’y 32 ka semana, o dunay timbang nga 500 grams ngadto sa ubos sa 2,500 grams.
Ang kantidad sa insurance coverage anaa sa P35,000 ngadto sa P135,000; samtang ang mga puya nga dunay fetal age nga 32 ka semana ngadto sa wala pay 37 ka semana, mahimo’ng maka-avail og insurance coverage nga P24,000 ngadto sa P71,000.
Sa karon dunay upat ka ospital ngahi sa Central Visayas nga nakontrata sa PhilHealth alang sa Z Benefits –- ang Vicente Sotto Memorial Medical Center alang sa kidney transplantation, pagpanambal sa early stage breast cancer, coronary artery bypass graft (CABG), ventricular septal defect (VSD), Tetralogy of Fallot (TOF), cervical cancer, ug selected orthopaedic implants; ang Perpetual Succour Hospital alang sa acute lymphocytic leukemia in children, early stage breast cancer, CABG, VSD, TOF, colon and rectum cancer; Cebu Provincial Hospital – Carcar City alang sa end-stage renal disease nga nagkinahanglan og peritoneal dialysis; ug ang Governor Celestino Gallares Memorial Hospital. (PR)