KON gusto kang mokaon og lamian nga barbecue, ma baboy man o manok, ang dali kaayong mosantop sa imong hunahuna mao ang barbacuehan sa Larsian sa may Fuente Osmena ning syudad sa Sugbo. Ang Larsian maoy naandan niadtong ganahang mokaon og barbecue, bisan niadtong mga di taga Sugbo.
Apan niabot ang panahon nga naghitak na ang Larsian food street. Busa nakahukom ang Kapitolyo nga sirad-an kini og tulo ka buwan alang sa rehabilitasyon niini. Gibuksan kini pagbalik niadtong Biyernes, Nobyembre 16. Nigasto ang Kapitolyo og P1.8 sa rehabilitasyon sa Larsian nga karong gitawag nag Larsian Food Street.
Gipasigarbo ni Larsian administrator Joey Herrera nga mas limpyo na ang dining area sa bag-ong Larsian, duna nay functional drainage ug water supply system, mas maayo nga pansayan ug washing area ingon man man parking space tupad niini nga maka-accommodate og 20 ka mga motorsiklo ug 40 ka mga sakyanan.
***
Matod pa ni Joey Herrera mas nidaghan ang mga stalls sa Larsian nga okupado na karon human sa rehabilitasyon niini. Sa wa pa sirhi ang Larsian niadtong Hulyo, 43 lang ka mga stall ang okupado. Karon nisaka na ngadto sa 59 ka mga stall ang okupado. Gipaabot nga mosaka og dugang P200,000 ang kita niini gikan sa abangan matag buwan.
Apan duna bay kausaban sa pagpadagan sa mga barbecuehan sa Larsian? Matod pa ni Herrera, ang mga food handlers gikinahanglan nga magsul-ob og hairnets ug mouth guards aron paglikay sa food contamination. Di na sab sila tugtan nga magsul-ob lang og tsinelas, shorts ug sleeveless shirts.
Ang mga food stalls inspeksiyunon matag karon ug unya sa Cebu City Health Office aron pagseguro nga ang ilang serbisyo sanitary. Kaniadto, ang mga barbecuehan sa Larsian nahimutang sa daplin gyud sa karsada. Mas lami ang barbecue kay dunay pakapin nga abog.
***
Matdo pa ni Herrera, ang mga food servers nga makalapas sa mga bag-ong lagda mahimong multahan ug P200 ngadto sa P300 ug mahimong i-ban hangtod sa hangtod sa Larsian. Ang mga stalls multahan og P1,000 ug gani, maihong rebukahon ang ilang kontrata.
Wa na kahay overcharging sa Larsian? Human sa reklamo sa usa ka netizen sa social media nga gi-overcharged siya sa duha ka food handlers sa arsian Food Street, ang duha gi-ban na sa Larsian.
Di na sab makaduol ang mga food handlers sa mga customer aron agnihon nga adto kaon sa ilang stall. “Kung naa gyuy mga stall owners ug food handlers nga dili mutuman sa among lagda, mas maayo dili ninyo i-patronize ang ilang stalls,” matod pa ni Herrera.