GILUGWAYAN sa Social Security System (SSS) ang loan restructuring program hangtod sa Abril sa sunod tuig alang sa mga miyembro nga duna pay nag-ung-ong nga bayranan sa calamity ug short-term loans nga naa nanimuyo sa mga dapit nga naapektuhan sa kalamidad.
Apan nihangyo si SSS President ug Chief Executive Officer Emmanuel Dooc sa mga member-borrower nga dili paabuton ang Abril 1, 2019 ug mopahimus sa LRP aron pagbayad sa ilang loans.
Sa ikaduhang hugna sa LRP gikan sa Hunyo ning tuiga hangtod sa Oktubre 31, niabot na og 28,220 ka restructuring nga mga aplikasyon sa Sugbo ang naaprobahan nga dunay kinatibuk-ang loan deliquencies nga mokabat sa P395,016,613 ug sa maong kantidad, P323,013,216 ang na-condone nga penalties.
Sa unang LRP gikan sa Abril 2016 hangtod sa Mayo 2017, niabot og 45,738 ka member-borrowers ang nakapahimus sa programa nga dunay kinatibuk-ang P646,392,043 loan penalties. Sa maong kantidad, P635,118,706 ang na-condone nga penalties.
Si Dooc niawhag sa mga miyembro nga hunongon na ang pag-unya-unya og lihok ug mo-apply na sa LRP tungod kay dili na sila mohatag og lugway sa sunod tuig.
“Alam niyo napakahirap po kumuha ng approval sa Office of the President ng loan restructuring. Napakahirap po, inuurirat kami, anong justification namin, sapagkat loan restructuring na-wawaive po ang dapat receivable namin,” pamahayag sa presidente sa SSS.
Ubos sa LRP, ang sumada sa principal ug kinatibuk-ang interests sa nangaging mga loan sa mga miyembro kay i-consolidate sa usa ka Restructured Loan diin mahimo kining bayaran pinaagi sa flexible payment hangtod sa lima ka tuig ug ubos nga interest rate sa tag tres porsyento sa matag tuig.
Sukad gilusad ang ikaduhang hugna sa programa niadtong Abril ning tuiga, ang SSS nakakolekta na og kapin sa P2 bilyones nga income gikan sa dul-an 300,000 ka mga miyembro nga nipahimus niini, sa unang lima ka buwan sukad gipatuman.
Kinahanglan ang aplikante kay mo-fill up sa LRP form sa bisan asang sanga sa SSS, magdala og valid identification nga mga dokumento ug letter of authority kon ang aplikasyon ipaagi sa awtorisadong representante. (SCG)