BISAN wala pa naaprubahan ang 2019 Annual Budget sa Kapitolyo, ang Cebu provincial Detention and Rehabilitation Center (CPDRC) pinaagi sa Bids and Wards Committee nangita na og mga kontraktor nga maka-supply sa nagkadaiyang food item alang sa mga piniriso.
Sa advertisement nga gipublikar diha sa website sa Kapitolyo, gipahibalo sa BAC nga nanginahanglan sila ug supplier sa nagkadaiyang food and miscellaneous items sama sa isda ug buwad, karneng baboy ug manok, fresh medium chieck egg, pan, assorted grocery, saging ug mga utanon.
Moabot sa kapin p62 milyunes s ang budget alang niini, nga mao nay magsilbing suplay sa pagkaon sa kapin 3 mil ka mga piniriso gikan Enero 1 hangtod Disyembre 31 sa tuig 2019.
Matod ni CPDRC Warden Reynaldo Valmoria, gikinahanglan ang sayo nga pagpangita ug supplier sa maong mga food item aron dili maputol ang suplay sa pagkaon sa mga piniriso. Kini nunot usab sa taas unya nga holiday atol pagsugat sa Pasko ug bag-ong tuig.
“It should be ma’am, it should be, ilabi na kay long week bitaw ang holiday,” niingon si Valmoria.
Sa Disyembre 3, gitakda sa BAC ang bid opening alang niini.
Sa laing bahin, gitakda nga moatubang si Valmoria sa budget hearing sa Committee on Budget and Appropriations sa Hunta Probinsiyal sa sunod semana, Nobiyembre 22.
Mangayo ug kapin sa P100 million nga budget anga CPDRC sa sunod tuig.
“Supposedly, kato’ng ni-agi, nangayo mi ug medyo higher gamay pero karon mao ra gihapon, mga hundred plus o 130 (million),” padayag ni Valmoria. (AZLG)