ARON mapalig-on sa Cebu City Police Office (CCPO) ang iyang kampanya batok sa gidili nga drugas, mopatuman kini og Big Brother, Big Sister program alang sa mga drug surrenderer.
Matod ni Sr. Supt. Royina Garma, director sa CCPO, nga bisan kon kuwang sila og mga sakop, positibo siya nga dunay madestino nga mga pulis nga maggiya sa mga drug surrender aron malikay sa paggamit og balik og illegal drugs.
Ubos sa programa, dunay i-assign nga pulis sa usa ka kanhi adik nga maoy tagsatagsa nga mo-follow up, motutok, mobisita sa balay o mo-text niini pagseguro nga dili na kini mosuyop sa gidili nga drugas.
“Go kami kahit walang pagkain, kahit kami na ang magbayad, we’ll do that,” sumala ni Garma nga nahinabi sa mga tigbalita human nakigpulong atubangan sa mga opisyal sa nagkalainlaing pundok sa mga layko sa IC3 Convention Center niadtong Sabado, Nobiyembre 17.
Naghan-ay sila sa mga lagda sa pagpatuman sa maong sistema ug pilion usab nila og tarong ang mga pulis nga maapil niini.
Iyang gipatabang ang Police Community Relations (PCR) sa CCPO sa pagplano ug paghan-ay sa mga lagda sa pagpatuman sa programa kay nalantawan niini nga posible kini makasugat og mga reklamo.
“I’m just thinking for the possible negative feedback or negative comment or interpretation of the program kung ang pulis natin will be visiting the houses kasi one-on-one into eh,” pamulong ni Garma.
Kon mahan-ay na ang tanan ug wala nay kakulian, ilusad sa CCPO ang Big Brother, Big Sister program sa sunod buwan.
Siya nisugyot nga duna usab mga pribadong pundok sa komunidad sama sa relihiyusong kapunungan ug kadtong respetado nga mosagop sa programa aron makigtambayayong sa kapulisan.
Alang niya mahimong epektibo ang programa kon ang drug surrenderer mismo ang boluntaryo nga mag-usab sa kaugalingon ug dawaton ang nahimo kalapasan.
“The first step for change is for you to accept that you have a problem. So, kahit anong gusto ng pulis kung hindi mo tinanggap na may problema ka, hindi namin maibigay ang programa para sa yo,” dugang ni Garma.
Siya nipadayag nga dili makaya sa kapulisan kon sa ilaha lang isangon ang pagsulbad sa suliran sa gidili nga drugas.
Si Fe Barino, chairperson sa Commission on the Laity, nipasalig nga padayon sila motabang sa kapulisan sa pag-usab sa mga kanhi nagumon sa illegal drugs pinaagi sa Surrender to God (SuGod) program nga dul-an na sa 750 ka drug surrender ang natabangan. (SCG)