GIUNAY sa usa ka amahan sa pag-hostage ang iyang kaugalingong pamilya Sabado sa gabii, Nobiyembre 17, sa Sitio Caduloy Riverside, Barangay Tisa, dakbayan sa Sugbo.
Kapin duha ka oras nga negosasyon bag-o naluwas ang upat ka mga gibuhag, duha niini ang menor-de-edad.
Ang suspetsado nga giingong nalisoan sa pangisip kinsa gituohan usab nga sabog sa ginadiling drugas naila nga si Elland Seseban, 35, residente ra usab sa maong dapit.
Nahitabo ang maong hostage taking alas 6:30 sa gabii niadtong Sabado sa panimalay ni Michael Marson, silingan sa suspek ug sa mga biktima.
Unang gisuwayan pag-hostage si Marson apan nakapangayo kini og tabang sa asawa sa suspetsado nga si Teresita Seseban, 33, kinsa kuyog usab ang 1-anyos nga anak niini atol sa pagsuway pagbadlong sa iyahang bana.
Nisunod ang anak sa suspetsado nga 6-anyos, lakip na ang inahan sa suspetsado nga si Cresencia Seseban, 64, ug didto na gi-hostage ni Elland ang upat.
Dala sa suspect ang 12-inches nga kutsilyo.
Daling niresponde ang kapulisan lakip na ang kapitan sa maong barangay nga si Phillip Zafra aron makig-negotiate sa maong suspek.
Dihang nagmalampuson pagsikop ang suspect nisyagit pa kini nga “naay mopatay nako,” kinsa giingon nga tulo ka adlaw na nga wala’y tulog, wala’y kaon, ug nigamit sa ginadiling druga. Alas 9:06 sa gabii na dihang na-rescue ang upat nga gi-hostage.
Wala’y naangkon nga samad ang maong mga biktima ug dali kini gidala sa usa ka tambalanan aron i-debrief ug ipaubos sa counseling.
Mapasalamaton usab si Zafra sa kapulisan hilabi na sa hepe sa Police Station 10 nga si Police Chief Insp. Keith Andaya. (HBL)