GIISIP nga labing dako nga kantidad sa shabu nga nasakmit karong tuiga pinaagi sa buy-bust operation sa Sitio Caimito, Barangay Tisa, dakbayan sa Sugbo, kagahapon sa kaadlawon, Nobiyembre 18.
Mokabat sa 3.3 kilos nga shabu nga nagkantidad og P39 milyones ang nasakmit kang Jeffrey Jade Cabaron, 25, kinsa nasakpan diha sa iyang giabangan nga lawak sa naasoy nga dapit.
Lumad nga taga Barangay Pasil si Cabaron.
Matod ni Cebu City Police Office (CCPO) Director Sr. Supt. Royina Garma nga mao kini ang labing dako nga kantidad sa shabu nga nasakmit karong tuiga.
“This year, ito ang pinakamalaking amount ng druga na confiscate during a buy-bust operation,” si Garma kinsa anaa atol sa operasyon.
Dugang ni Garma nga gikan sa ilang mga surveillance ingon man sa pakisusi nila sa mga nagnegosyo niining ilegal nga drugas, gitudlo nga si Cabaron ang supplier niini.
Apan wala na’y nisunod sa taas pa kang Cabaron.
Giisip ang suspek nga level 1 drug pusher.
Matod ni Garma nga ilahang ipa-update ang lishatan sa Barangay Anti-Drug Abuse Council sa matag barangay sa dakbayan sa Sugbo aron mas daling masuta kining drug personalities.
Si Tisa Barangay Captain Phillip Zafra sa iyang bahin mihangop sa kapulisan sa maong malampuson nga operasyon apan naguol usab kini nga bisan paman sa ilang kampanya batok sa ilegal nga drugas hitak gihapon kini.
“Considering this development however, we will be conducting investigation as to when he rented the place, who are his cohorts and what is the extent of his operation in our barangay. We will be coordinating with our authorities over this matter,” matod ni Zafra.
Nanawagan usab kini sa mga negosyante hilabi na sa mga nagpaabang nga sutaon ang background sa mga moabang og lawak.
“In addition, we are calling on once again (for the nth time) those in the business of renting houses, apartments and the like to please check the background of their tenants and to immediately report to our barangay or any authorities for that matter if they look and/or act suspiciously," dason niya.
Ang Pardo Police Station mao ang nihimo sa malampusong operasyon batok sa gidiling druga. (B)