SUPERBALITA CAGAYAN DE ORO

Todino: Kinsa kaha ang tinuod nga basura?

ANG gipaabot sa publiko mao nga pasakaan na unta og kaso kining Verde Soko Philippines Industrial Corp., ang consignee sa kapin sa 6,500 toneladas nga “basura” gikan sa South Korea.

Giangkon na sa maong kompaniya nga wala silay import clearance ug misdeclared ang maong kargamento.

Unsa pa may giluhat sa atong gobiyerno? Kon ang yanong drayber sa motorsiklo dakpon tungod walay lisensiya, unsa may kalainan niining maong kalapasan nga walay import clearance.

Nanimaho naman gani ang giingong basura diha sa Mindanao Container Terminal sa Tagoloan, matod ni Mayor Heckert Emano. Tiaw mo niadtong Hulyo ug Oktubre pa kini ning-abot sa lungsod ug hangtod karon wala mahaw-as sa pantalan.

Giinsister sa Verde Soko Philippines Industrial Corp. nga soft plastic ug dili basura ang kargamento. Mga raw materials daw kini nga ilang iproseso aron himuon pellets.

Apan, sa gihimong inspeksiyon sa gobiyerno, nasuta nga dili pa sangkap sa ekipo ang pasilidad sa maong korporasyon alang sa pagproseso niining soft plastic.

Ang pasalidad kuwang sa mga sangkap nga mosala sa hugaw aron dili maaektohan ang kalikopan sa palibot.

Naghugpong na karon ang nagkadaiyang ahensiya sa gobiyerno aron mosusi kon makahilo o delikado ba kining “basura” alang sa panglawas ug kinaiyahan.

Hangtod dili mahuman ang ilang pakisusi, dili sab nato mahibaw-an ang rekomendasiyon sa ahensiya kon unsay himuon nianang nagtipun-og karon nga basura.

Pero, lahi kining paglapas sa proseso sa pag-import og kargamento. Nasuta sa Customs nga walay import clearance ug misdeclared ang kargamento.

Dunay kalapasan sa balaod ug angay lang gisang-at nila ang tukmang kaso o multa sa maong korporasiyon. Di ba?

Kon masuta nga toxic kining mga kargamento, unya mamatud-an nga “basura” gyud diay, laing kaso na pud ang atubangon sa Verde Soko Philippines Industrial Corp.

Basin molanat pa kining imbestigasyon sunod tuig. Magduda na ang katawhan nga dunay maniobra nga nahitabo diha. Busa, ayaw gyud ninyo pug-oka ang pakisusi, ug sa labing dali nga panahon, ipahibaw gilayon sa publiko ang resulta sa inyong pakisusi.

Kon mapakyas kining Department of Environment and Natural Resources, Bureau of Customs, Department of Health, ang local government unit sa Tagoloan, ug ang Provincial Board sa Misamis Oriential sa paghatag og tiunay ug makatagbaw nga resulta, ayaw ninyo basula ang publliko nga tawgon mo og basura.

Mahibaw-an ra nato kon kinsa gyud and tinuod nga basura.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph